विराटनगर, ३० माघ । सुनसरीको भोक्राहा गाउँपालिकाको वडा नम्बर २ मा बीउ उत्पादन तथा भण्डारण केन्द्र निर्माण हुने भएको छ । प्रधानमन्त्री कृषि आधुनिकीकरण परियोजना अन्तर्गत भोक्राहामा बन्न लागेको बीउ स्रोत केन्द्र (कृषि बिकास) को औपचारिक कार्यक्रमका बिच शिलान्यास गरिएको छ ।

जिल्ला समन्वय समिति सुनसरीका प्रमुख गोपाल राजभण्डारीले बीउ स्रोत केन्द्र भवनको शिलान्यास गरेका छन् । उक्त भवन ६१ लाख ९ सय ८२ रुपैंया लागतमा निर्माण गर्न लागिएको हो ।

स्थानीयको लागत सहभागितामा निर्माण गर्न लागिएको बीउ केन्द्रको स्थापना किसानको हकमा लाभकारी हुने बताइएको छ । प्रधानमन्त्री कृषि आधुनिकीकरण परियोजना सुनसरीका कार्यक्रम संयोजक दिपेन्द्र पोखरेलका अनुसार बीउ स्रोत केन्द्रले स्थानीय किसानको उत्पादन खरीद गरी उन्न्नत बीउ उत्पादन गर्र्ने छ ।

भण्डारण गरिएको किसानको उत्पादनलाई ग्रेडिङ पश्चात उन्नत जातको बीउ बिजनका रुपमा तयार पारी सहज बिक्रि वितरण गर्ने योजना अनुरुप संरचना निर्माण थालिएको पोखरेलले बताए ।

उत्पादनको हिसाबले उर्वर र किसानको बाक्लो बसोबास रहेको क्षेत्रलाई लक्षित गरी भोक्राहामा पूर्वाधार निर्माण थालिएको परियोजना कार्यालय सुनसरीले जनाएको छ । बन्न लागेको संरचनाको लागि गाउँपालिकाले थप सहयोग उपलब्ध गराउने जनाएको छ ।