विराटनगर, ११ माघ । गुराँस पुस्तकालय विराटनगरद्वारा प्रकाशित बरगाछी पत्रिकाको १६ औं अंकको आज विमोचन गरिएको छ । प्रजातन्त्रका कमाण्डर मुक्तिप्रसाद–यदुनाथ चापागाईं विशेषाङ्कका रुपमा प्रकाशित १६ औं अंकको नेपाली कांग्रेसका वरिष्ठ नेता रामचन्द्र पौडेल र पूर्व सञ्चारमन्त्री मीनेन्द्र रिजालले विमोचन गरेका हुन् ।

कार्यक्रममा राजनीतिक व्यक्तित्व सम्मानबाट प्रजातन्त्र सेनानी देवी डांगी सम्मानित भएका छन् । डाँगीलाई नगद २१ हजार रुपैयाँसहित दोसल्ला र सम्मानपत्रले सम्मानित गरिएको छ । यस्तै मुक्तिप्रसाद–यदुनाथ सामाजिक सम्मानबाट कोरोना महामारीका कारण मृत्यु भएका व्यक्तिहरूको शव व्यवस्थापनमा सहयोग गर्ने युवाहरूलाई सम्मानित गरिएको छ ।

सम्मानित हुनेहरूमा राम नेपाल, रविन कार्की, प्रयोग चापागाईं, संजोग गौतम, दृष्यम शाक्य र अनुराग भण्डारी छन् । युवा समूहलाई नगद १५ हजारसहित दोसल्ला र सम्मानपत्र प्रदान गरिएको छ । सम्मानित युवाहरूलाई नेपाली कांग्रेसका बरिष्ठ नेता रामचन्द्र पौडेल, पूर्व सञ्चारमन्त्री डा मीनेन्द्र रिजाललगायतले सम्मान गरे ।

कार्यक्रमलाई सम्बोधन गर्दै वरिष्ठ नेता पौडेलले कांग्रेसको बटमलाइन प्रतिनिधिसभा पुनस्थापना नै भएको बताए । उनले कांग्रेस पद र प्रतिष्ठामा नलोभिई नियम, कानुन र सिद्धान्तअनुसार चल्ने पार्टी भएको धारणा राखे ।

कार्यक्रममा पूर्व सञ्चारमन्त्री रिजाल, बरगाछी पुस्तकका सम्पादक दधिराज सुवेदी, आयोजक संस्थाका अध्यक्ष दीपक चापागाईंलगायतले मन्तव्य राखे ।