एजेन्सी, २२ पुस-अग्लो कदका तीव्र गतिका बलर काइल जेमिसनले ११ विकेट लिएसँगै न्युजिल्याण्डले पाकिस्तानलाई दोस्रो टेस्टमा एक इनिङ्स र १ सय ७६ रनको विशाल अन्तरले पराजित गरेको छ । यो जितसँगै न्युजिल्याण्ड टेस्ट क्रिकेटको विश्व वरियतामा पहिलो नम्बरमा उक्लेको छ ।

पहिलो इनिङ्मा पाँच विकेट लिएका जेमिसनले दोस्रो इनिङ्समा पनि प्रभावशाली खेल प्रदर्शन गर्दै पाकिस्तानका ६ खेलाडी आउट बनाए । ट्रेन्ट बोल्टले ३ विकेट लिएका थिए भने केन विलियम्सनले १ विकेट हात पारे ।

पहिलो इनिङ्मा २ सय ९७ रन बनाएको पाकिस्तानले दोस्रो इनिङ्मा १ सय ८६ रन मात्र बनाउन सक्यो । पहिलो इनिङ्समा ६ सय ५९ रन बनाएको न्यूजील्याण्डले अन्ततः पाकिस्तानलाई एक इनिङ्स र १७६ रनले पराजित गरेको हो ।

दुई खेलको यस शृंखलामा न्यूजीन्यान्डले २-० ले विजयी भएको छ । पहिलो इनिङ्मा व्यक्तिगत २ सय ३८ रन बनाएका कप्तान केन विलियम्सनले म्यान अफ द म्याच र म्यान अफ द सिरिजको उपाधि जिते ।

दोस्रो इनिङ्समा पाकिस्तानका अविद अलिले २६, मोहम्मद अब्बासले ३, अजहर अलिले ३७, ह्यारिस सोहेलले १५, फवाद आलमले १६, मोहम्मद रिजवानले १०, फाहिम अश्रफले २८, जफार गोहारले ३७ रन बनाएका थिए ।