विराटनगर, ६ कात्तिक-पछिल्लो २४ घण्टामा प्रदेश १ मा मात्र कोरोना भाइरसको संक्रमणबाट थप नौ जनाको मृत्यु भएको छ । संक्रमणका कारण चार महिला र पाँच पुरुषको मृत्यु भएको हो । पछिल्लो २४ घण्टाको अवधिमा कोरोना संक्रमणका कारण झापाकी एक महिला र सुनसरीका तीन महिला र पाँच पुरुषको मृत्यु भएको छ ।

योसँगै हालसम्म प्रदेश प्रदेश १ मा कोरोना भाइरसको संक्रमणबाट मृत्यु हुनेको संख्या ३२१ पुगेको छ । जसमध्ये तीन महिला र २१ पुरुष प्रदेश १ बाहिरका रहेको सामाजिक विकास मन्त्रालयले जनाएको छ ।

कुन जिल्लामा कति जनाको मृत्यु ?

कोरोना संक्रमणबाट प्रदेश १ को सुनसरी जिल्लामा हालसम्म सबैभन्दा बढी ११७ जनाको मृत्यु भएको छ । मृत्यु हुनेमा ४४ महिला र ७३ पुरुष रहेका छन् । त्यसैगरी, मोरङमा २६ महिला ७३ पुरुष, झापामा २० महिला ३९ पुरुष, धनकुटामा तीन/तीन महिला र पुरुष, उदयपुरमा दुई महिला र पाँच पुरुष, तेह्रथुममा एक महिला र तीन पुरुष, इलाममा एक/एक महिला र पुरुष, पाँचथरमा एक पुरुष, ताप्लेजुङमा दुई महिला र प्रदेश १ बाहिरका तीन महिला २१ पुरुषको मृत्यु भएको सामाजिक विकास मन्त्रालयले जनाएको छ । भोजपुर, खोटाङ, सोलुखुम्बु, संखुवासभा र ओखलढुंगामा कोरोना संक्रमणबाट मृत्यु हुनेको संख्या शून्य रहेको मन्त्रालयले जनाएको छ ।