विराटनगर, २७ कात्तिक–स्वास्थ्य तथा जनसंख्यामन्त्री भानुभक्त ढकालले प्रदेश नं १ को सरकार, विराटनगर महानगरपालिका र निजी क्षेत्रको सक्रियतामा निर्माण भईरहेको ‘नागरिक केयर सेन्टर’को आज अनुगमन गरेका छन् ।

मन्त्री ढकालले कोरोना संक्रमितको उपचारका लागि एचडियु र अक्सिजन सहितको एक सय वेडको नागरिक सेन्टरको निर्माण कार्य गरिएकोमा प्रशंसा गरे । उनले. सेन्टरको अनुगमन गर्दै संक्रमित उपचारका लागि अक्सिजन, आईसियु र भेन्टिलेटरको आवश्यकता देखिएकाले सरकारको यसलाई प्राथमिकता राखेको बताए ।

मन्त्री ढकालले सरकारले सुविधा सम्पन्न ३५ सय वेड थप गर्ने तयारी गरेको जानकारी दिदै दुुई हजार उपत्यकामा र बाँकी देशका विभिन्न स्थानमा स्थापना गरिने बताए । उनले कोरोना संक्रमितको उपचारमा समस्या नहोस् भनेर सरकारले भौतिक संरचना तयारीलाई पनि ध्यान दिएको बताए ।

सरकारले कोरोना परीक्षण र उपचार निःशुल्क गर्ने बताउँदै मन्त्री ढकालले खोपका लागि आवश्यक तयारी भईरहेको जानकारी दिए । उनले खोप परीक्षण सफल हुनसाथ आयातका लागि कानुनी समस्या नहोस भनेर अध्यादेश तयार गरिएको जानकारी दिए ।

प्रदेश नं १ का सामाजिक विकासमन्त्री जीवन घिमिरे, राज्यमन्त्री जसमाया गजमेर र सेन्टरका संयोजक पवन सारडा लगायतले प्रदेश सरकारको रु २ करोड, निजी क्षेत्रको रु १ करोड ५० लाख र महानगरपालिकाको रु २५ लाखको लागतमा निर्माण कार्य भइरहेको जानकारी दिए । मन्त्री ढकालले यसअघि कोशी अस्पताल विराटनगरको पनि अनुगमन गरेका थिए ।