विराटनगर, १६ भदौ–कोरोना परिक्षणका लागि स्वाव संकलन गरिएपनि झण्डै एक साता सम्म रिपोर्ट नआउने गरेको पाइएको छ । कोरोना संक्रमणको आशंकामा स्वाव संकलन गरिएका व्यक्तिहरुको परिक्षण रिपोर्ट आउन ढिलाई हुने गरेको मात्र नभई रिपोर्टनै गायब समेग हुने गरेको गुनासो सम्बन्धीत व्यक्तिहरुले गरेका छन् ।

कोरोना आशंकामा मोरङको बुढीगंगा गाउँपालिका–२ स्थित मधुग्राम आधारभुत विद्यालयको क्वारेन्टाइनमा बसेका व्यक्तिहरुको कोरोना परिक्षणका लागि स्वाब संकलन गरिए पनि त्यसको रिपोर्ट प्राप्त नहुँदा अन्यौलमा रहेको उनीहरुले गुनासो गरेका छन् ।

बुढीगंगा गाउँपालिका वडा नं. ३, ५ र १ नं. वडाका व्यक्तिहरुको ‘कन्ट्र्याक्ट ट्रेसिङको’ आधारमा सोही विद्यालयमा गत भदौ १० गते कोरोना परिक्षणका लागि स्वाव संकलन गरिएपनि त्यसको रिपोर्टनै अहिलेसम्म नआएको हो । ‘१० गतेनै स्वाव संकलन गरेर परिक्षणका लागि कोशी अस्पतालमा लागिएको थियो । अहिलेसम्म हामीले रिपोर्ट प्राप्त गरेका छैनौँ । गाउँपालिकासँग बुझ्दा रिपोर्ट आइसकेको छैन भन्छ । कोशी अस्पतालसँग बुझ्दा रिपोर्ट पठाइसकेको भन्ने जवाफ आयो । कोशीमा १२ गतेसम्म स्वाव संकलन गरेको रिपोर्ट आइसकेको देखिन्छ ।’ स्वाव दिएक एक जनाले भने,‘गाउँपालिकाले रिपोर्टमा लापरवाही गरेको छ । नेगेटिभ भए नेगेटिभ वा पोजेटिभ भए पोजेटिभ भन्ने कुरा त हुनुपर्छ नी ? तर, अहिलेसम्म हाम्रो परिक्षणको नतिजा आएको छैन । हामी त्यसै क्वारेन्टाइनमा बसेका छौँ । रिपार्ट नआउँदा रोगले हैन चिन्ताले मर्न लागियो ।’ उनले आफुसहित ८ जना व्यक्तिको परिक्षण रिपोर्ट अहिलेसम्म नआएको जानकारी दिए ।

उता गाउँपालिकाले भने विराटनगरबाहेक अन्य पालिकाको रिपोर्ट आउन ढिलाइ हुने गरेको दावी गरेको छ । गाउँपालिकाका स्वास्थ्य शाखा प्रमुख बासुदेव रेग्मीले कोशी अस्पतालबाटै रिपार्ट नआएको दावी गरेका छन् । ‘गाउँपालिकालाई कोशी अस्पतालबाटै रिपोर्ट प्राप्त भएको छैन । के भएको भनेर हामी बुझि रहेका छौँ ।’ उनले भने,‘विराटनगरबाहेक अन्य पालिकाको रिपोर्ट आउन करिब १ हप्ता समय लागदै आएको छ । त्यसैले रिपोर्टमा ढिलाई भएको हुन सक्छ ।’