विराटनगर, १० भदौ-कोरोना संक्रमण रोकथाम तथा नियन्त्रणका लागि विराटनगरमा शुक्रबार मध्यरातिदेखि निषेधाज्ञा जारी भएको छ । जिल्ला सुरक्षा समिति मोरङको शुक्रबार बसेको बैठकले भदौ १० गते मध्यरातिसम्म ५ दिन निषेधाज्ञा जारी गर्ने निर्णय गरेको मोरङका प्रमुख जिल्ला अधिकारी कोषहरी निरौलाले जानकारी दिए ।

विराटनगर महानगरपालिकाले लगाएको २१ दिनको लकडाउन शुक्रबार समाप्त भएपछि निषेधाज्ञा जारी भएको हो । महानगरले ७ दिन निषेधाज्ञा जारी गर्न प्रस्ताव गरेको भएपनि सुरक्षा समितिले ५ दिन मात्र निषेधाज्ञा गर्ने निर्णय गरेको विराटनगर महानगरपालिकाका मेयर भीम पराजुलीले जानकारी दिए ।

विराटनगरमा तीन सातादेखि लकडाउनको अवस्था कायम रहेको भएपनि मानिसहरुको आवागमनमा थप कडाई गर्न निषेधाज्ञा जारी गर्ने निर्णय गरेको प्रजिअ निरौलाले बताए ।

प्रजिअ निरौलाका अनुसार सो समय अवधिभर पाँच जनाभन्दा बढी हिँडडुल गर्न निषेध गरिनेछ र बेलुका ९ बजेदेखि बिहान ५ बजेसम्म हिँडडुललाई पूर्णरुपमा निषेध गरिएको छ ।

निषेधाज्ञामा सार्वजनिक सेवाका क्षेत्रको सवालमा अहिले भइरहेका कामहरुले भने निरन्तरता पाउने प्रजिअ निरौलाले जानकारी दिएका छन् । । अत्यावश्यक सेवा बाहेकका काम भने बन्द हुनेछन् । महानगरले घोषणा गरेको लकडाउन प्रभाबकारी नभएको र संक्रमण दर बढिरहेकोले निषेधाज्ञा जारी गरिएको हो । विराटनगरमा हालसम्म कोरोना संक्रमितको संख्या ७७४ पुगिसकेको छ ।