कोसी अस्पतालको प्रयोगशालामा गरिएको परीक्षणबाट सोही अस्पतालका ७ जना स्वास्थ्याकर्मीमा कोरोना संक्रमण देखिएको हो । यसैगरी विराट अस्पतालका तीन जना स्वास्थ्यकर्मीलाई पोजेटिभ देखिएको छ ।

कोसी अस्पतालको पोष्टनेटल वार्डमा कार्यरत एकजना नर्सलाई सोमबार कोरोना पोजेटिभ देखिएको थियो । उनी विराट अस्पतालमा समेत काम गर्दै आएकी थिइन् ।

विराटनगर अस्पतालमा दशजना बाहेक नगरक्षेत्र भित्रका ६ जना र झापा ठेगाना भई विराटनगर बस्दै आएका दुईजनामा समेत संक्रमण पुष्टि भएको छ ।

जम्मा संख्या १८ देखिएकोमा १६ जनाको ठेगाना विराटनगर उल्लेख भएको महानगरपालिका स्वास्थ्य महाशाखा प्रमुख रमेश कार्कीले जानकारी दिए ।

परीक्षणका क्रममा विराटनगर महानगरपालिका–६ मा ३८ र ५४ वर्षीय दुई पुरुष, विराटनगर–१० मा ३७ वर्षीया महिला र ३५ वर्षीय पुरुष, विराटनगर १३ मा एक पुरुष र विराटनगर ५ मा ३५ वर्षीय पुरुषमा कोरोना देखिएको जनाइएको छ ।

विराटनगर १० की ३७ वर्षीया महिला पेशाले चिकित्सक हुन् । संक्रमण पुष्टि भएका कोसी र विराट अस्पतालका १० जना स्वास्थ्यकर्मी तथा कर्मचारीहरु सबैको ठेगाना विराटनगर नै रहेको जनाइएको छ ।