नेपालमा सुर्ति सेवनकै कारण प्रतिवर्ष २७ हजार बढी नागरिकको मृत्यु हुने गरेको भन्दै नेटवर्कले यस्तो सुझाव दिएको हो । नेटवर्कको समन्वयमा रिसोर्स सेन्टर फर प्राइमरी हेल्थ केयरले आयोजना गरेको कार्यक्रममा नेटवर्कका संयोजक शान्तराम मुल्मीले नेपालमा प्रतिवर्ष २७ हजार १ सय ३७ जनाको मृत्यु हुने गरेको बताए । सहज पहुँचका कारण ग्रामीण क्षेत्रमा ३९.२ प्रतिशतले सुर्ति सेवन गर्ने गरेको उनले बताए । सर्वसाधारणको पहुँच नहुने गरी उत्पादन र बिक्रीवितरणमा कर बढाउनुपर्ने उनले बताए ।

सरकारले आफैँले बनाएको नीतिहरूसमेत कार्यान्वयनमा कमजोर देखिएको उनको भनाइ छ । सुर्तिजन्य उत्पादनमा ९० प्रतिशतभन्दा बढी चेतावनीमूलक सन्देश राख्ने नियम भए पनि स्वदेशी कम्पनीहरूले पालना नगरेको तर्फ सरकारको ध्यान जान नसकेको उनले बताए ।

विदेशी कम्पनीहरूले समेत सो नियमको पालना गर्ने गरेको भए पनि नेपालको सूर्य नेपाल टोबाकोले ७५ प्रतिशत मात्रै चेतावनीमूलक सन्देश छाप्ने गरेको उनले बताए । सरकारले आफ्नो नियम पालना गराउनुको सट्टा सुर्तिजन्य वस्तु उत्पादन गर्ने कम्पनीहरूलाई सम्मान गरेर उनीहरूको इज्जत बढाउन काम गरिरहेको उनको भनाइ छ ।

नेपालमा १० वर्षभन्दामाथि उमेर समूहका ३३ प्रतिशत व्यक्तिले सुर्ति सेवन गर्ने गरेको तथ्याङ्क छ । जसमा २७ प्रतिशत पुरुष र ६ प्रतिशत महिला रहेका छन् । तथ्याङ्कअनुसार सबैभन्दा बढी पहाडी क्षेत्रमा ६८.२ प्रतिशत, तराई क्षेत्रमा ४२.२ प्रतिशत र मध्यपहाडी क्षेत्रमा ४० प्रतिशतले सुर्ति सेवन गर्ने गरेका छन् ।

९८ प्रतिशत बढी व्यक्तिलाई सुर्ति सेवन स्वास्थ्यका लागि हानिकारक छ भन्ने थाहा हुँदहुँदै पनि सेवन गर्ने गरेको तथ्याङ्कले देखाउँछ । सुर्तिसेवन गर्ने व्यक्तिहरूका कारण कार्यक्षेत्रमा २२.५ प्रतिशत र घरमा ३३.५ प्रतिशत सुर्ति सेवन नगर्ने व्यक्तिहरू क्यान्सरको सिकार भइरहेका छन् ।