विराटनगर, साउन ९–सशस्त्र प्रहरीका पूर्व डिआईजी रञ्जन कोइराला रिहाइ गरेको प्रति प्रदेश–१ का सांसदहरूले बिरोध गरेका छन् । शुक्रबारको संसद बैठकमा सांसदहरूले श्रीमती मार्नेलाई सर्वोच्च अदालतले छुटकारा दिएको भन्दै बिरोध गरेका हुन् ।

संसदको शून्य समयमा बोल्दै सांसद अम्बिका भण्डारीले अदालतलेनै हत्यारालाई छुटकारा दिन थालेको आरोप लगाइन् । उनले न्याय मरेको भन्दै अदालतले नै हत्यारालाई छुटकार दिए न्याय खोज्न कहाँ जाने भन्दै प्रश्न गरिन् ।

सांसद कुसुम श्रेष्ठले हत्यारालाई छाड्ने अदालतको फैसलाको बिरोध गरिन् । उनले अपराधी छाड्ने अदालतको निर्णयले न्यायमूर्तिमाथि अविश्वास बढ्ने बताइन् । उनले फैसलाको पुनरावलोकन गर्न माग गरिन् ।

यसैबीच दश वटा विधेयक पारित गर्दै प्रदेश–१ प्रदेशसभाको छैटौं तथा बजेट अधिवेशन सकिएको छ । आजको बैठकमा प्रदेश प्रमुखको पत्र पढेर सुनाउँदै बजेट अधिवेसन आज रातिदेखि समाप्त हुने प्रदेशसभाका सभामुख प्रदीपकुमार भण्डारीले जानकारी दिए । बैठकमा सभामुख भण्डारीले बजेट अधिवेशनमा प्रदेशसभामा दर्ता भएका सबै विधेयक पारित भएको बताए ।