काठमाडौं, १३ असार-सत्तारुढ दल नेपाल कम्युनिस्ट पार्टी (नेकपा) को तेस्रो दिनको स्थायी कमिटीको बैठकमा उपाध्यक्ष वामदेव गौतमले आज सिङ्गो पार्टी   लाइनमा आउँदा आफ्नो जित भएको बताएका छन् ।

उपाध्यक्ष गौतमले भनेका छन्, ‘महाकाली सन्धि हुँदा आफूहरूले महाकालीको मुहान लिम्पियाधुरा हो भन्दा कारबाही भएको थियो । तर, आज सिङ्गो पार्टी र सरकार मेरो भनाइमा पुगेको छ । यही कारण मेरो जित भएको छ । पार्टीले मलाई कारबाही गरेको थियो । त्यो गल्ती सच्याउनुपर्छ । मलाई न्याय दिनुपर्छ ।’

उनले अगाडि थपे, ‘आफूले उठाएको कुरा गलत हो भन्ने तत्कालीन महासचिव माधवकुमार नेपाल यही बैठकमा हुनु हुन्छ । उहाँहरूले त्यो समयमा मलाई गलत भनेर कारबाही गर्नुभयो । मैलै सही कुरा उठाउँदा पनि गलतभन्दा पार्टी विभाजनसमेत भयो । आज सही ठाउँमा पार्टी, सरकार र सिङ्गो देश पुगेको छ ।’

उपाध्यक्ष गौतमले आफूले सीमा नदी कहाँ हो त्यो पहिला टुङ्गो लगाएर जाउ भनेको बैठकमा स्मरण गराए । त्यो समयमा महाकाली नदीको मुहानको बारेमा टुङ्ग्याएको भए यस्तो अवस्था नआउने उनको भनाई थियो ।