काठमाडौं, १२ असार-प्रदेश २ प्रहरी कार्यालयले आचरणविपरीत काम गरेको भन्दै २ जना असईसहित ३ जना प्रहरी कर्मचारीलाई निलम्बन गरेको छ । निलम्बनमा पर्नेमा रौतहट जिल्लाको इलाका प्रहरी कार्यालय पिपरा रजवाडा दरबन्दी भई प्रहरीचौकी औरैयामा कार्यरत प्रहरी सहायक निरीक्षक ललित शाह, सोही कार्यालयमा कार्यरत प्रहरी जवान दिनेश हजारा रहेको प्रदेश २ प्रहरीले जनाएको छ ।

प्रदेश २ का प्रहरी प्रमुख डीआईजी धीरजप्रताप सिंहका अनुसार उनीहरू दुवैले वित्तीय अपराध (हुण्डी) मा संलग्न व्यक्तिको आर्थिक प्रलोभनमा परी सहयोग पुर्‍याएको प्रमाणित भएको छ ।

डीआईजी सिंहले भ्रष्टाचारविरुद्धको शून्य सहनशीलता र आन्तरिक शुद्धीकरण गर्ने नीतिअनुरुप कारबाही गर्ने सिलसिलामा प्रदेश प्रहरी कार्यालयबाट निलम्बन गरिएको बताए ।

त्यसैगरी, रौतहटकै इलाका प्रहरी कार्यालय देवाही गोनाहीमा दरबन्दी भई प्रहरी चौकी ब्रह्मपुरी, रौतहटमा कार्यरत प्रहरी सहायक निरीक्षक सञ्जीवकुमार झाले सुध्रिने मौका पटकपटक दिँदा पनि प्रहरी आचरणविरुद्धका काम कारबाही गरेको र नसुध्रिएकाले उनलाई पनि निलम्बन गरिएको प्रहरी प्रवक्ता एवं सूचना अधिकारी प्रहरी नायव उपरीक्षक मकेन्द्रकुमार मिश्रले जानकारी दिए ।