सुर्खेत, ९ असार-कर्णाली प्रदेश अस्पतालमा कोरोना संक्रमित एक जनाको मृत्यु भएको छ । दैलख दुल्लु नगरपालिका–३ का ३५ वर्षीय पुरुषको गएराति साढे ९ बजे मृत्यु भएको हो ।

असार ३ गते सामान्य उपचारका लागि आएका ती पुरुष क्षयरोगका बिरामी रहेको र अस्पतालमा चेकजाँच गर्दा कोरोना पुष्टी भएको कर्णाली प्रदेश अस्पतालका कोरोना फोकल पर्सन डा.केएन पौडेलले बताए ।

‘उहाँ सामान्य बिरामी जस्तै उपचारका लागि दैलेखबाट आउनु भएको थियो,’ उनले भने, ‘आइसीयुमा उपचार भइरहेकोमा सोमबार राति मृत्यु भएको हो ।’

मृतकले दुई महिनादेखि क्षयरोग औषधी सेवन गर्ने गरेको र बिरामी भएपछि उपचारका लागि प्रदेश अस्पतालमा आएको डा. पौडेलले जानकारी दिए । योसँगै कर्णालीमा कोरोना संक्रमणका कारणले मृत्यु हुनेको संख्या ५ पुगेको छ ।