जनकपुरधाम, ८ असार-नागरिकता ऐन २०६३ को शंसोधन विद्येयकमा राखिएको प्रावधानको प्रदेश २ का विभिन्न जिल्लामा विरोध बढ्दै गएको छ । यसैबीच, आज जनकपुरधाममा नागरिकता विद्येयकको विरोधमा प्रधानमन्त्री केपी शर्मा ओलीको पुत्ला दहन गरिएको छ ।

जनता समाजवादी पार्टीका नेता तथा कार्यकर्ताको सक्रियतामा सडकमा बसेर सडकअवरुद्व गर्दै उनीहरूले प्रधानमन्त्री ओलीको पुत्ला दहन गरेका हुन् ।

जसपाका केन्द्रीय सदस्य सञ्जय चौधरीले सरकार नसच्चिए आन्दोलन थप सशक्त बनाउने बताए । अर्का नेता रामजी रायले प्रधानमन्त्री ओली देशमा सम्प्रदायिक दंगा फैलाउने षड्यन्त्रमा लागेको आरोप लगाए ।

जनकपुरधाम उपमहानगरकी उपप्रमुख रिता झा, नेतृ विभा ठाकुर, पुनम मैथिलसहितको अगुवाईमा महिला नेतृले सडक जाम गर्दै प्रदर्शन गरेका हुन् ।

नेपाली पुरुषसँग विवाह गर्ने विदेशी महिलालाई ७ वर्षपछि अङ्गीकृत नागरिकता प्रदान गर्ने प्रावधानसहित नागरिकता विधेयक संसदीय समितिबाट पास भइसकेको छ ।

राज्य व्यवस्था समितिको बैठकले निकै लामो समयदेखि रोकिएर रहेको उक्त विधेयक प्रमुख प्रतिपक्षसहित केही दलको फरक मतको बाबजुद बहुमतका आधारमा आइतबार पारित गरेको थियो । विधेयक पारितसँगै केही दलले समर्थन गरे पनि केहीले भने चर्को विरोध गरिरहेका छन् ।