विराटनगर, २७ जेठ । नेकपा (एमाले) का अध्यक्ष केपीशर्मा ओलीले मुलुकमा आफ्नो पार्टी मात्र बाममन्थी पार्टी भएको बताएका छन् । विराटनगर विमानस्थलमा शुक्रबार पत्रकारहरुसँग कुरा गर्दै अध्यक्ष ओलीले यस्तो बताएका हुन् ।

उनले एमाले मात्र बामपन्थी पार्टी भएको बताउँदै आगामी निर्वाचनमा कांग्रेसको पछि लागेर आफुलाई बामपन्थी भन्ने कुनै पनि पार्टीसँग गठबन्धन नहुने दावी गरे ।
उनले आफ्नो पार्टीले कसैलाई प्रधानमन्त्रीको अफर नगरेको समेत स्पष्ट पारे ।

अध्यक्ष ओलीले आगामी संघ र प्रदेशको निर्वाचनमा आफ्नो पार्टीलाई जनताले पहिलो पार्टी बनाउनेसमेत बताए । उनले नेपाली जनताले आगामी प्रदेश र संसदीय निर्वाचनमा पार्टीलाई अत्यधिक स्थानमा विजयी गराई पहिलो बनाउने दावी गरे ।

अध्यक्ष ओलीले स्थानीयतहको निर्वाचनले सबै निर्वाचनको स्थिति तय नगर्ने बताए । उनले भर्खरै सम्पन्न स्थानीयतहको निर्वाचनमा सिट संख्याको हिसाबले केही कम आएर दोस्रो भए पनि लोकप्रिय मतका हिसाबले एमाले देशको पार्टी पहिलो भएको बताए ।

अध्यक्ष ओली मोरङका अगुवा कार्यकर्तालाई प्रशिक्षण दिन विराटनगर आइपुगेका हुन् । उनलाई स्वागत गर्न विराटनगर महानगर महानगरपालिकाका मेयर नागेश कोइराला, उपमेयर शिल्पाकार्की पुगेका थिए ।