काठमाडौं, ३१ जेठ-नेपालमा थप दुई जनाको कोरोना भाइरस संक्रमणका मृत्यु भएको पुष्टि भएको छ । स्वास्थ्य तथा जनसंख्या मन्त्रालयका प्रवक्ता डा. जागेश्वर गौतमले नेपालमा १ बालकसहित २ जनाको मृत्यु भएको पुष्टि गरेका हुन् ।

पर्साको घण्टाघर नजिकै बेवारिसे अवस्थामा भेटिएका २५ वर्षीय १ व्यक्तिमा कोरोना भाइरस संक्रमण पुष्टि भएको उनले बताए । ३ दिनअघि बेवारिसे अवस्थामा शव भेटिएपछि पोस्टमार्टमका लागि नारायण अस्पतालमा ल्याइएको र त्यहाँ नै स्वाब परीक्षण गर्दा कोरोना भाइरस पोजेटिभ देखिएको उनले बताए ।

बाराको निजगढ नगरपालिका ६ को योजनाटोल निवासी ५ वर्षीय बालक पनि कोरोना भाइरस संक्रमणबाट मृत्यु भएको उनले बताए । ती बालकमा ज्वरो तथा स्वासप्रश्वासमा समस्या देखिएपछि हिजो वीरगंज हेल्थ केयर अस्पतालमा उपचारका लागि ल्याइएको थियो ।

आरडीटीमा पोजेटिभ देखिएपछि आइसोलेसनमा राखिएको तर उपचारकै क्रममा उनको मृत्यु भएको उनले बताए । उनका अनुसार ती बालकको स्वाब संकलन गरी नारायण अस्पतालमा परीक्षण गर्दा कोरोना संक्रमण पुष्टि भएको छ । योसँगै नेपालमा कोरोना भाइरस संक्रमणबाट मृत्यु हुनेको संख्या १८ पुगेको छ ।