एजेन्सी, जेठ ३०-अमेरिकाका एक उच्च सैनिक अधिकारीले राष्ट्रपति डोनाल्ड ट्रम्पसँगै आफू पनि ह्वाइट हाउस नजिकैको एउटा चर्चमा गएर फोटो खिचाएको घटनाप्रति माफी मागेका छन् ।

१ जुनमा राष्ट्रपति ट्रम्पले ह्वाइट हाउस नजिकै रहेको एउटा चर्चमा बाइबल समातेर फोटो खिचाएका थिए । सो क्रममा अफ्रिकी अमेरिकी नागरिक जर्ज फ्लाइडको हत्याको विरुद्धमा प्रदर्शन गरिरहेकाहरुलाई अश्रु ग्यास प्रयोग गरी त्यहाँबाट सुरक्षाकर्मीले हटाएका थिए ।

प्रदर्शनकारीमाथि बल प्रयोग गरेर ट्रम्पले फोटो खिचाएको घटनापछि तीव्र आलोचना भइरहेको छ । जर्ज फ्लोइडको हत्यापछि प्रहरी ज्यादती र रंगभेदको विरोध भएको आन्दोलनमा फोटो खिचाउन ट्रम्पले बल प्रयोग गरेका थिए ।

त्यस क्रममा ट्रम्पले आफूसँगै उच्च अधिकारीहरुलाई पनि लगेका थिए । सो क्रममा ट्रम्पसँगै हिँडेर चर्चमा पुगेका अमेरिकी सेनाका शीर्ष अधिकारी जनरल मार्क मिलीले आफूबाट गल्ती भएको स्वीकार गर्दै माफी मागेका हुन् । सो घटनाले सैनिकलाई राजनीतिक घटनाक्रममा सामेल गरेको भन्दै त्यसप्रति आफूले माफी माग्ने बताएका छन् ।