काठमाडौं, जेठ २३-रुकुम घटनाको विशेष समिति बनाएर छानबिन गरिने भएको छ । रुकुम घटनालाई लिएर प्रतिपक्षी सांसदहरूले बैठक अवरुद्ध गरेपछि सभामुख अग्नि साप्कोटाले संसदीय समिति बनाउने आश्वासन दिएका हुन् ।

उनले संसदमा रहेका दलहरूसँग परामर्श गरेर समिति बनाउने संसदलाई जानकारी गराएका छन् । रुकुम घटनालाई लिएर प्रतिनिधिसभाको बैठक सुरु हुनेबित्तिकै छानबिन समितिको माग गर्दै प्रतिपक्षी दलले अवरुद्ध गरेका थिए ।

‘आवश्यक अध्ययन तथा अनुगमन गरेर सभामा प्रतिवेदन पेस गर्न प्रतिनिधिसभामा प्रतिनिधित्व गर्ने दलहरूसँग आवश्यक छलफलपश्चात् प्रतिनिधिसभा नियमावली २०७५ काे नियम १७७ बमोजिम संसदीय विशेष समिति गठन गरिने व्यहोरा माननीय सदस्यहरूलाई जानकारी गराउँदछु,’ सभामुख सापकाेटाले भने ।

१० जेठमा सोतीस्थित मल्ल थरकी प्रेमिकालाई बिहे गरेर लैजान जाजरकोटबाट आएका युवामाथि गाउँलेले आक्रमण गरेका थिए । आक्रमणमा ६ जना युवाको ज्यान गएको थियो ।