काठमाडौं, २२ जेठ-सरकारले जारी गरेको लकडाउको आज ७३औँ दिन पुगेको छ । कोरोना भाइरस (कोभिड–१९) रोकथाम तथा नियन्त्रणका लागि सरकारले गत चैत ११ गते यता लकडाउन गर्दै आएको छ । जेठ ३१ गते सम्मका लागि लकडाउन लम्ब्याइएको छ । लकडाउन लम्बिँदै जाने तर संक्रमणको जोखिम कम नहुने देखिएपछि अहिले लकडाउनको उलङ्घन हुन थालेको छ ।

बिहीबार काठमाडौं उपत्यकाका मुख्य सडकमा सवारी साधनको चाप बढेको छ । लामो समय लकडाउन हुँदा जनजीवन सँगसँगै आर्थिक जीवन समेत प्रभावित हुन थालेपछि मानिस काममा निस्कन थालेका छन् । त्यसैले सडकमा सवारी साधनको चाप बढेको हो । प्रहरीले सवारी साधनको जाँचलाई केही खुकुलो बनाएको देखिन्छ ।

अत्यावश्यक सेवा, ढुवानी सेवा, पासवाहक सवारी साधन बाहेक पनि सरकारी कर्मचारी, बैंकका तथा उद्योग प्रतिष्ठानका कर्मचारीलाई परिचय पत्र हेरी सवारी सञ्चालन गर्न दिइएको छ । कुनै पनि संस्थाको परिचयपत्रबिना सवारी चलाउनेलाई भने प्रहरीले नियन्त्रणमा लिई कारबाही गरेको छ ।

उपत्यकाका भित्रि सडकमा पनि मानिसको आवागमन बाक्लो बनेको छ । सबै प्रकारका पसल खुलेका छन् । मानिस किनमेलका लागि निस्केको देखिन्छ । साना व्यवसायीको संगठन नेपाल राष्ट्रिय व्यवसायी महासंघले आजैदेखि पसल खुला गरेका छन् । काठमाडौंको न्यूरोड, भोटेबहाल, भोटाहिटीलगायतका ठाउँका पसल बिहान ८ बजेदेखि ११ बजेसम्म सञ्चालनमा आएका छन् । निजी क्षेत्र तथा विज्ञले पनि लकडाउनको ढाँचा परिवर्तन गरी जनजीवनलाई सहज बनाउन सुझाव दिँदै आएका छन् ।