विराटनगर । सुनसरीको देवानगन्जमा गोली चलाई तीन जनालाई घाइते बनाएको आरोपमा प्रहरीले दुई जनालाई पक्राउ गरेको छ। पक्राउ पर्नेमा देवानगन्ज-१ का २७ वर्षीय रविन कुमार यादव र सोही ठाउँका २१ वर्षीय पिन्टु यादव रहेका छन्।
सुनसरी प्रहरी प्रमुख एसपी सुमन कुमार तिम्सिनाका अनुसार, दुवै आरोपीलाई विराटनगरबाट पक्राउ गरी सुनसरी ल्याइएको छ। प्रहरीले यस घटनामा पाँच जनाको संलग्नता रहेको बताएको छ, जसमध्ये तीन जना अझै फरार छन्।
प्रहरी स्रोतका अनुसार, गोली चलाउने मुख्य आरोपी कामेश्वर यादव हुन्, जो हालसम्म फरार रहेका छन्। प्रारम्भिक अनुसन्धान अनुसार, यो घटना आर्थिक लेनदेनको विवादका कारण घटेको हो।
पक्राउ परेका रविन यादव यसअघि पनि विभिन्न मुद्दामा पक्राउ परेका थिए। उनी एक महिना अगाडि लागूऔषध मुद्दामा पक्राउ परेर अदालतबाट धरौटीमा छुटेका व्यक्ति हुन्।
बेलुकी ६:३० बजेतिर देवानगन्जमा तीन राउन्ड गोली चलेको थियो। गोली लागेर देवानगन्ज गाउँपालिका-७ का २१ वर्षीय शिवकुमार मेहता र रविन कुमार यादव घाइते भएका थिए। शिवकुमारको अवस्था गम्भीर रहेको छ, उनको पेटमा गोली लागेको र हाल विराटनगरस्थित नोवेल मेडिकल कलेजमा उपचार भइरहेको छ।
प्रहरीले फरार रहेका अन्य आरोपीहरूको खोजी तीव्र पारेको जनाएको छ।