पोखरा, १७ जेठ-लकडाउनका कारण अर्थतन्त्र सिथिल भएको भन्दै पोखरा क्षेत्रका व्यावसायिक प्रतिष्ठानका प्रतिनिधिले समय तालिका मिलाएर सबै व्यापार/व्यवसाय खोल्नुपर्ने माग गरेका छन् । उनीहरूले प्रशासनले तोकेको समयमा सुरक्षाका सबै निर्देशन पालना गर्दै व्यवसाय गर्न तयार रहेको प्रतिबद्धता पनि व्यक्त गरेका हुन् ।

पोखरा उद्योग वाणिज्य संघले संघसँग आवद्ध वस्तुगत संघका प्रतिनिधि तथा सदस्यबीच गरेको भर्चुअल बैठकको क्रममा उनीहरूले सो धारणा राखेका हुन् ।

पोखरा उद्योग वाणिज्य संघका अध्यक्ष दामु अधिकारीले सधैँभर लकडाउन भनेर कति व्यवसाय बन्द गर्ने भन्ने प्रश्न राख्दै उद्योगी/व्यवसाय संचालन गर्न दिए त्यसले थोरै मात्र भए पनि अर्थतन्त्रलाई चलायमान बनाउने धारणा राखेका छन् । संघीय सरकारले ल्याएको बजेटले निजी क्षेत्रलाई केही उत्साहित बनाएको बताउँदै उनले बजेटको व्यवहारिक कार्यान्वयन गर्न माग गरे ।

संघका वरिष्ठ उपाध्यक्ष नारायण कोइरालाले पोखरा उद्योग वाणिज्य संघले उद्योग/व्यवसाय संचालनको वातावरण बनाउन प्रशासनसँग माग गरिरहेको जानकारी दिँदै संघले गरेका कतिपय कामको सूचना सम्प्रेषण नभएको स्वीकार गरे । उनले प्रदेश र स्थानीय सरकारले गरेका कतिपय निर्णयमा स्थानीय प्रशासन बाधक बन्दा व्यवसाय खुलाउन समस्या भएको पनि बताए ।