काठमाडौं, १० जेठ-नेपालमा थप ३६ जनामा कोरोना भाइरस (कोभिड-१९) संक्रमित थपिएका छन् । देशका विभिन्न अस्पतलामा गरिएको पछिल्लो परीक्षण विवरणअनुसार थप ३६ जनामा कोरोना भाइरस संक्रमण पुष्टि भएको हो ।

स्वास्थ्य तथा जनसंख्या मन्त्रालयका प्रवक्ता विकास देवकोटाले नेपालमा थप ३६ जनामा कोरोना भाइरस संक्रमण पुष्टि भएको नियमित पत्रकार सम्मलेनमा जानकारी दिए । उनका अनुसार कोसी अस्पतलाको प्रयोगशालामा गरिएको परीक्षण डिल्लीराजमणि मावि क्वारेन्टाइन झापामा रहेका थप एक जनामा १ जना ३३ वर्षीय पुरुषमा पोजेटिभ देखिएको छ ।

त्यसैगरी, राप्ती स्वास्थ्य विज्ञान प्रतिष्ठानमा गरिएको परीक्षणमा नरैनापुर मदर्साका ६ जना १७ देखि ३२ वर्षसम्मका पुरुषमा पोजेटिभ देखिएका छन् । नरैनापुर ३ को राष्ट्रिय माबि गेगलीको क्वारेन्टाइनमा गरिएको नमुना संकलनमा १५ जनामा कोरोना संक्रमण पुष्टि भएको छ । उनीहरू १७ देखि ३२ वर्ष उमेर समूह पुरुषका रहेका छन् ।

त्यसैगरी नरैनापुर १ को राष्ट्रिय प्रावि महातनीयामा गरिएको नमुना संकलनमा ६ जनाको नमुना पोजेटिभ देखिएको छ । उनीहरू २२ देखि ५० वर्षका पुरुष हुन् । बर्दियाको बढैयाताल-७ का १ जना १९ वर्षीय पुरुषमा पनि कोरोना भाइरस पोजेटिभ देखिएको छ ।

प्रवक्ता देवकोटाका अनुसार सुर्खेतमा गरिएको परीक्षणमा पनि ३ जनामा संक्रमण पुष्टि भएको छ । उनीहरू २ जना पुरुष हुन् भने १ जना महिला हुन् । योसँगै ५ सय ८४ जनामा कोरोना भाइरस संक्रमण पुष्टि भएको छ । जसमध्य पुरुष ५ सय ५ जना र ७९ जना रहेका छन् ।

स्वास्थ्य मन्त्रालयको पछिल्लो तथ्यांकअनुसार नेपालमा अहिलेसम्म प्रयोगशालामा पीसीआर विधिबाट ४५ हजार ९ सय ५७ नमुना परीक्षण गरिएको छ । ८६ हजार २ सय ३५ को आरडीटी परीक्षण गरिएको छ । २४ घण्टामा ३ हजार ४ सय ९४ पीसीआर विधिबाट परीक्षण गरिएको छ भने ४ हजार १ सय १९ जनाको आरडीटी विधिबाट परीक्षण गरिएको छ ।