पोखरा, ६ जेठ-गण्डकी प्रदेशका मुख्यमन्त्री पृथ्वीसुब्बा गुरुङसहित ६ जना मन्त्रीको कोरोना भाइरस (कोभिड-१९) परीक्षणका लागि ‘स्वाब’ नमुना संकलन गरिएको छ । प्रदेश सरकारले आह्वान गरेको संसद अधिवेशनको पूर्वसध्यामा मुख्यमन्त्री, मन्त्री, सचिव र कर्मचारीलगायतको कोरोना परीक्षणका लागि ‘स्वाब’ संकलन गरिएको हो ।

मन्त्रीसहित मन्त्रालयका सचिव, कर्मचारीसहित पिएसओ, सुरक्षाकर्मी गरी १ सय ४६ जनाको स्वाब संकलन भएको मुख्यमन्त्रीका प्रेस संयोजक विक्रम न्यौपानेले जानकारी दिए । सम्भावित जोखिमबाट सतर्क रहन पिसिआर परीक्षण गरिन लागेको उनले बताए ।

गण्डकी प्रदेश सरकराले यही जेठ ११ गतेका लागि संसद बैठक आह्वान गरिसकेको छ । संसदमा सहभागि हुने सबै सांसद र कर्मचारीहरुको पनि परीक्षण गर्ने तयारी रहेको छ,’ उनले भने, मुख्यमन्त्री र मन्त्रीसहित कर्मचारीको स्वाब संकलन भयो । सभामुख सहित अन्य सांसदको बुधबार स्वाब संकलन गर्ने तयारी छ ।’

सभामुखसहित अन्य सांसदको स्वाब संकलन बुधबार बैठक आह्वान गरिएको स्थल पोखरा सभा गृह हलमा नै गरिने भएको उनले बताए । प्रदेश प्रयोगशालको प्राविधिक सहयोगमा स्वाब संकलन गरिएको थियो ।