विराटनगर, ६ जेठ-मोरङको रतुवामाई नगरपालिका–१ सोनापुरका १ युवकमा कोरोना संक्रमण पुष्टि भएपछि सो क्षेत्रलाई सिल गर्ने निर्णय गरिएको छ । नगरपालिकामा कोरोना भाइरस रोकथाम प्रतिकार्य र व्यवस्थापन कार्यदलको बैठकले कोरोना भाइरस नियन्त्रणका लागि आगामी जेठ १० गतेसम्म वडा नम्बर १ को सोनापुर गाउँ सिल गर्ने निर्णय गरेको नगर प्रमुख रवीन राईले जानकारी दिए ।

उनले सो वडाको पूर्वमा भल्कुवा जंगल, पश्चिममा बक्राह खोला, उत्तरमा सोनापुर जाने कल्भर्ट र दक्षिणमा भारतसँग जोडिएको सीमासम्म आवत जावत पूर्णरुपमा बन्द गरिएको बताए ।

उनका अनुसार भारतबाट लुकिपिछि नेपाल आएका ती युवकको र्‍यापिड परीक्षण गर्दा पोजेटिभ देखिएपछि विराटनगरस्थित प्रादेशिक प्रयोगशालमा गरिएको पीसीआर परीक्षणमा संक्रमण पुष्टि भएको थियो । स्वास्थ्य अवस्था सामान्य रहेका उनको विराटनगर स्थित कोभिड–१९ उपचार केन्द्रमा उपचार भइरहेको छ ।

उनी जेठ २ गते भारतको मुम्बईबाट नेपाल आएका थिए । ती युवकले नेपाल आएपछि परीक्षणअघि नै परिवार र स्थानीयसँग भेटघाट गरेको पाइएको छ । परिवारसहित सम्पर्कमा आएकाहरुलाई क्वारेन्टाइनमा राखिएको नगरप्रमुख राईले जानकारी दिए । उनले कोरोना संक्रमित युवक परिवारसहित १२ जनाको सम्र्कमा पुगेको पाइएकाले सवैको मंगलबार स्वाव संकलन गरिँदैछ ।

उनका अनुसार भारतबाट नेपाल आउनेका कारण कोरोना संक्रमणको जोखिम बढेपछी नगरक्षेत्रमा लक डाउन थप कडाइका साथ पालना गरिएको छ ।