एजेन्सी, जेठ ५-जर्मन बुन्डेस लिगामा शीर्ष स्थानको बायर्न म्युनिख विजयी भएको छ । कोरोना भाइरसको महामारीका बीच ६६ दिनपछि पुनः सुरु भएको बुण्डेस लिगामा बायर्नले युनियन बर्लिनलाई उसकै मैदानमा २-० ले हराएको हो ।

बायर्नको जीतमा रोबर्ट लेवान्डोस्की र बेन्जामिन पाभार्डले १-१ गोल गरे । खेलको ४०औँ मिनेटमा पाएको पेनाल्टीमा गोल गर्दै लेवान्डोस्कीले बार्यनलाई सुरुवाती अग्रता दिलाएका थिए ।

पाभार्डले ८०औँ मिनेटमा गोल गरेपछि बायर्न २-० ले विजयी भएको हो । जीतपछि शीर्ष स्थानको बायर्नको २६ खेलबाट ५८ अंक भएको छ । दोस्रो स्थानको बोरुसिया डर्टमुण्डको समान खेलबाट ५४ अंक छ । आइतबार राती नै भएको खेलमा कोल्न र माइन्जले २-२ को बराबरी खेल्दै अंक बाँडेका छन् ।