काठमाडौं, ४ जेठ-वाणिज्य, आपूर्ति तथा उपभोक्ता संरक्षण विभागले आजदेखि आपूर्ति व्यवस्थापनका लागि सवारी पासकाे व्यवस्था गर्ने भएकाे छ । यसअघि दिइएको सबै पास रद्द भएपछि शनिबार आपूर्ति व्यवस्थापन सवारी पास जारी गर्ने मापदण्ड बनाएर विभागमा दर्ता भएका फर्म तथा कम्पनीलाई पुनः नयाँ पासको व्यवस्था गरिएको हो ।

दर्ता भएका फर्मले आफू सदस्य रहेको सम्बन्धित छाता संस्थाबाट प्रयोजन खुलाएर विभागमा निवेदन दिएपछि मात्र सवारी पास अनुमति दिने व्यवस्था गरिएको सूचना अधिकारी रवीन्द्र आचार्यले जानकारी दिए । उनका अनुसार अनुसार फर्म वा कम्पनीले नेपाल उद्योग वाणिज्य महासङ्घ, घरेलु तथा साना उद्योग व्यवसायी महासङ्घ, नेपाल समुद्रपार निकासी पैठारी संघ र नेपाल चेम्बर अफ् कमर्सबाट विभागले उपलब्ध गराएको ढाँचामा प्रयोजन खुलाएर निवेदन दिएपछि विभागले औचित्यका आधारमा व्यहोरा खोली आवश्यक सङ्ख्यामा नीलो रङ्गको पास जारी गर्नेछ ।

विभागले पालिकाले तोकेको समयमा वा समय नतोकेकामा बिहान र साँझ व्यावसायिक कारोबार सञ्चालनमा ल्याउने, कारोबार गर्दा मूल्यसूची राख्ने, बिलबीजक जारी गर्ने र म्याद गुज्रेका सामान अलगै राखी वितरकलाई नै फिर्ता गर्ने प्रबन्ध मिलाउन आग्रह गरेको छ ।