एजेन्सी, जेठ ४-इटलीले आगामी जुन महिनादेखि विदेश जान र आउन लगाएको प्रतिबन्ध फुकुवा गर्ने घोषणा गरेको छ । प्रधानमन्त्री जुजेप्पे कोन्टेले इटालीभित्रको आन्तरिक वाह्य यात्रा खुला गर्न लागिएको जानकारी दिएका हुन् ।

इटालीका जनतालाई फेरि स्वतन्त्र रुपमा एक क्षेत्रबाट अर्को स्थानमा जान पाउने अनुमति दिइनेछ । १८ मेमा अन्त्य हुने गरी अवागमनमा लगाएको प्रतिबन्धहरू १२ हप्ताभन्दा पछि  हटाउन लागिएको हो । इटाली युरोपमा फैलिएको कोरोना भाइरसको प्रकोपको केन्द्रबिन्दु बनेको थियो । संक्रमण नियन्त्रणका लागि इटालीले युरोपमा सबैभन्दा पहिले कडा लकडाउनको घोषणा गर्दै यात्रामा प्रतिबन्ध लगाएको थियो ।

सुरुमा केही आलोचनाको सामना गर्नुपरेपनि बन्दाबन्दी नै संक्रमण रोक्ने उत्तम उपाय रहेको ठहर गर्दै लामो समयसम्म आवागमन तथा व्यापारिक गतिविधिमा समेत रोक लगाएको थियो ।

इटालीले पहिलो पटक १० मार्चमा लागू भएको घरेलु लकडाउनका सर्तहरू बिस्तारै सहज गर्दै गएको छ । ४ जुनमा अन्तराष्ट्रिय आवागमनलाई खुलाउने पहिलो कदम हुनेछ ।