काठमाडौं, बैशाख ३०-संघीय संसदको प्रतिनिधिसभामा अर्थमन्त्रीको उपस्थिति नभएको भन्दै विरोध जनाइएको छ । आगामी आर्थिक वर्षको पूर्वबजेट छलफलको क्रममा अर्थमन्त्री डा. युवराज खतिवडा उपस्थित नभएपछि सांसदहरूले विरोध जनाएका हुन् ।

संघीय संसदमा प्रि बजेट छलफलमा प्रतिनिधिसभाको बैठकमा सांसदहरूले दलीय आधारमा बोल्दै थिए ।  संसदको प्रि बजेट छलफलमा भाग लिन अर्थमन्त्री खतिवडा संसद पुगे पनि शून्य समयपछि दलीय आधारमा बोल्ने क्रममा उनी नदेखिएपछि सांसदले विरोध गरेका हुन् ।

शून्य समय समाप्त भएपछि दलीय आधारमा सभामुख अग्निप्रसाद सापकोटाले सांसदहरूलाई बजेटको सिद्धान्त र प्राथमिकतामा बोल्न समय उपलब्ध गराए । उनले दिएको समयमा बोल्ने क्रममा राप्रपाका सांसद राजेन्द्र लिङ्गदेन रोष्टममा पुग्दा अर्थमन्त्रीलाई नदेखेपछि जिज्ञासा कसले सुन्ने भन्दै उनले सभामुखको ध्यानाकर्षण गराएका हुन् ।

अर्थमन्त्री खतिवडाले आइतबार आगामी बजेटको सिद्धान्त प्राथमिकता प्रस्तुत गरेका थिए । बजेटको सिद्धान्त र प्राथमिकतालाई केन्द्रित गरेर सोमबार र मंगलबार छलफल राखिएको हो । आज सांसदले उठाएको जिज्ञासाको जवाफ दिएपछि आगामी जेठ २ गते नीति तथा कार्यक्रम प्रस्तुत गर्ने कार्यतालिका छ ।