एजेन्सी, बैशाख २७-आर्थिक संकट र कोरोना भाइरसको संक्रमणसँग जुझिरहेको इराकको संसदले एक महिनासम्म चलेको तानातानपछि नयाँ सरकारलाई आफ्नो समर्थन दिएको छ । गत बुधबार भएको मतदानपछि पूर्व गुप्तचर अधिकारी मुस्तफा अल कधिमीले नयाँ प्रधानमन्त्री पदको सपथ लिएका छन् ।

कधिमी अदेल अब्दुल महदीको स्थान लिनका लागि प्रस्ताव गरिएका तेस्रो व्यक्ति हुन् । उनले ट्विटमा भनेका छन्, ‘हाम्रो लक्ष्य इराकको सुरक्षा स्थिरता र समृद्धि हो ।’

उनले आफ्नो कार्यकाल पूर्ण मन्त्रिपरिषदसहित गर्न भने नपाउने भएका छन् । राजनीतिक दलहरुबीच अझै पनि तेल र विदेश मन्त्रालयजस्ता मुख्य मन्त्रालयमा कसलाई ल्याउने भन्नेबारेमा छलफलमा रहेका छन् ।

संसदले व्यापार, संस्कृति, कृषि र प्रवासी मामलाजस्ता मन्त्रालयका लागि कधीमिले छानेका नेताको नाम अस्वीकार गरेको छ । अमेरिका र संयुक्त राष्ट्र संघले इराकमा नयाँ सरकार निर्माण भएकोमा स्वागत गरेको छ ।

तर उनीहरुले तत्कालै इराकको समस्यामाथि ध्यान दिन आग्रह समेत गरेका छन् । शिया समुदायका ५३ वर्षीय मुस्तफा अल कधिमीलाई राजनीतिक रुपमा स्वतन्त्र र तार्किक नेताका रुपमा चिनिन्छ ।

उनी एक पूर्वपत्रकार समेत हुन् । उनले सद्दाम हुसेनको शासनका समयमा लामो समय बेलायत र इरानमा निर्वासनमा बिताएका थिए । उनले त्यसबेला पनि सद्दाम हुसेनविरुद्ध खुलेर लेख्ने गर्दथे । सत्ता परिवर्तनपछि उनले गुप्तचर विभागमा काम गरेका थिए ।

सन् २०१६ देखि लिएर गत महिनाको अन्त्यसम्म उनी इराकी नेशनल इन्टेलिजेन्स सर्भिसका प्रमुख थिए । यो विभागमा उनको कार्यकालको अन्तिम समयतिर उनलाई नयाँ सरकार गठन गर्ने जिम्मेवारी दिइएको थियो ।

तर संसदमा आवश्यक बहुमत जुटाउन नसकेपछि मोहम्मद अल्लावी र अदनान अल–जुर्फीले आफ्नो नाम फिर्ता लिएका थिए । कधिमी भने ठूलो राजनीतिक समूहको समर्थन जुटाउन सफल भए । उनलाई अमेरिका र छिमेकी देश इरानले समेत मन पराउने बताइन्छ । तर उनले मन्त्री चयनलाई लिएर केही समस्या झेल्नुपरेको छ ।