एजेन्सी, बैशाख २६-भारतले एकतर्फी रूपमा नेपाली भूमि लिपुलेक हुँदै चीन जोड्ने सडकमार्गको उद्घाटन गरेको छ । रक्षामन्त्री राजनाथ सिंहले भारतबाट चीनसम्मको सीमा जोड्ने ८० किलोमिटर लामो सडकमार्गको भिडियो कन्फ्रेन्समार्फत उद्घाटन गरेका हुन् ।

चीनको सीमासम्म बाटो बन्दा भारत सामरिक रुपमा बलियो हुने उनको भनाई थियो । कैलाशसरोवर जानका लागि यो मार्गबाट सहज हुनेछ । यस मार्गले नेपालको सीमासमेत जोड्नेछ । धारचुलाबाट ३ देशको अन्तर्राष्ट्रिय सीमाको सडक सुरक्षामा पुग्न ४ दिन लाग्ने भारतका सुरक्षाकर्मी अब एकै दिनमा त्यहाँ पुग्न सक्नेछन् ।

रक्षामन्त्री सिंहले सडक निर्माणका लागि बीआरओले गरेको कामको प्रशंसा गरेका थिए । यस क्षेत्रमा बाटो निर्माण गर्नु ठूलो चुनौती रहेको उनको भनाइ थियो । मन्त्रीले हरियो झण्डा देखाएर धारचुलाका लागि एसएसबीको सवारी साधन पठाएका थिए । अब शनिबार बिहान धारचुलाबाट चीनको सीमा जानेछ ।

उदघाटन समारोह नैनीसेनामा भएको थियो । कार्यक्रममा मुख्य अभियन्ता विमल गोस्वामी, विवेक भूषण, ओसी कर्नल सोमेन्द्र बनर्जी, जिल्ला अधिकारी डा ।विके जोगदंडे, प्रहरी प्रीति प्रियदर्शिनिको उपस्थिति थियो ।

सन् २००६ देखि लिपुलेकदेखि सडक निर्माण कार्य सुरु भएको थियो । २०१२ सम्ममा निर्माण गर्ने लक्ष्य राखेपनि भौगोलिक कारणले निर्माण प्रक्रियामा बाधा आएपछि पहाडको चट्टान फुटाउन अष्ट्रेलियाबाट आधुनिक मेसिन ल्याइएको थियो । नेपाली भूमिमा भारतले एकतर्फी रूपमा सडक बनाएको विषयमा नेपाल सरकारले कुनै प्रतिक्रिया दिएको छैन ।