मस्को, बैशाख १८–रुसी प्रधानमन्त्री मिखाइल मिसहुस्तिनलाई कोरोना भाइरस (कोभिड–१९) संक्रमणको पुष्टि भएको छ । प्रधानमन्त्री मिसहुस्तिन स्वयंले कोरोना भाइरस संक्रमण भएको पुष्टि गरेका हुन् ।

प्रधानमन्त्री मिसहुस्तिनले बिहीबार राष्ट्रपति भ्लादिमिर पुटिनसँग भिडियो कन्फरेन्समार्फत आफूलाई कोभिड–१९ पोजेटिभ देखिएको जानकारी गराएका हुन् । भिडियो कन्फरेन्समार्फत उनले कोरोना संक्रमण भएका कारण आफ्नो अनुपस्थितिमा जिम्मेवारी सम्हाल्न नयाँ नियुक्तिका लागि आग्रह गरेका थिए ।

उनले यतिबेला आफ्ना सहकर्मीहरुको सुरक्षाका लागि आफु अनिवार्य सेल्फ आइसोलेसनमा बसेको समेत जानकारी गराएका छन् । प्रधानमन्त्री मिसहुस्तिनलाई कोरोना संक्रमणको पुष्टि भएसँगै राष्ट्रपति पुटिनले उनकै सिफारिसमा एन्ड्री बेलउसोभलाई उक्त जिम्मेवारी सम्हाल्न सुम्पिएको कार्यभार पत्रमा हस्ताक्षर गरेका छन् ।

रुसमा हालसम्म उच्च पदस्थ व्यक्तिमा कोरोना संक्रमण भएको प्रधानमन्त्री मिसहुस्तिन पहिलो व्यक्ति हुन् । प्रधानमन्त्री मिसहुस्तिनले बुधबार सरकारको कोरोना भाइरस नियन्त्रण संयोजन परिषदको बैठकलाई सम्बोधन गरेका थिए ।

रुसमा हालसम्म कोरोना संक्रमितको संख्या १ लाख ६ हजार ४ सय ९८ जना रहेको छ भने बिहीबार ७ हजारभन्दा बढी कोरोना संक्रमित थपिएका हुन् ।

कोरोना संक्रमणबाट रुसमा हाल सम्म १ हजार ७३ जनाले ज्यान गुमाइ सकेका छन् भने ११ हजार ६ सय १९ जना पूर्णरुपमा निको भएका छन् । यस अघि बेलायतका प्रधानमन्त्री बोरिस जोनसनलाई पनि कोरोना संक्रमण भएको थियो । उनी उपचार पश्चात पूर्णरुपमा निको भएर काममा फर्किसकेका छन् ।