काठमाडौं, १७ वैशाख-धानमन्त्री केपी शर्मा ओलीको पक्षमा हस्ताक्षर गर्नका लागि प्रधानमन्त्री निवास बालुवाटारमा छिरेका अधिकांश सांसद भित्रै अड्किएका छन् ।  ओलीले संसदमा आफ्नो बहुमत देखाउनका लागि हस्ताक्षर अभियान सुरु गरेका थिए ।

बुधबार बिहानबाटै बालुवाटारमा हस्ताक्षर गर्न जाने सांसदको चहलपहल देखिएको छ । ५ बजेका लागि सचिवालय बैठक डाकिएकोमा सञ्चारकर्मीलाई समेत प्रवेशमा रोक लगाइएको छ । भित्र गएका सांसद बाहिर निस्कन पाएका छैनन् ।

बैठकमा प्रधानमन्त्री केपी शर्मा ओली, अर्का अध्यक्ष पुष्पकमल दाहाल ‘प्रचण्ड’, झलनाथ खनाल, माधवकुमार नेपाल, वामदेव गौतम, रामबहादुर थापा ‘बादल’, विष्णु पौडेल, नारायणकाजी श्रेष्ठ सहभागी रहेका छन् ।

प्रधानमन्त्री ओलीले वैशाख ८ गते पार्टी विभाजन सहज हुने गरी राजनीतिक दलसम्बन्धी र प्रतिपक्षलाई बाइपास हुने गरी संवैधानिक परिषद्को काम कर्तव्य र अधिकारसम्बन्धी अध्यादेश ल्याएपछि उब्जिएको परिस्थितिलाई समाधानका लागि बैठक डाकिएको हो ।

यद्यपि दुवै अध्यादेश दबाब थेग्न नसकेर सरकारले १२ गतेको मन्त्रिपरिषद्बाट फिर्ता लिएको छ । दुवै अध्यादेश राष्ट्रपतिबाट खारेजसमेत भएको छ ।

यद्यपि नेकपाका नेता, सांसद र कार्यकर्ताहरूले प्रधानमन्त्री ओलीको नियतलाई लिएर प्रश्‍न उठाएका छन् । उनलाई अर्का प्रचण्ड, नेपाल र खनाल समूहले १ व्यक्ति १ पदको व्यवस्था लागू गर्न दबाब दिएको बताइएको छ ।