काठमाडौं, १७ वैशाख-नेपाल कम्युनिस्ट पार्टी (नेकपा) भित्रको आन्तरिक शक्तिसंघर्ष चर्किंदै जाँदा प्रधानमन्त्रीसमेत रहेका अध्यक्ष केपी शर्मा ओली पक्षधर सांसदहरूले बहुमत जुटाउन हस्ताक्षर अभियान सुरु गरेका छन् ।

वरिष्ठ नेता माधव नेपाल पक्षले अध्यक्ष र प्रधानमन्त्री पद छाड्न दबाब दिइरहेका बेला ओलीले आफ्नो पक्षमा सांसदको बहुमत जुटाउन हस्ताक्षर थालेका हुन् ।

ओली पक्षमा बहुमत जुटाउन सांसदले हस्ताक्षर गरिरहेको १ सांसदले बताए । उनका अनुसार बहुमत जुटिसकेको छ । ओली पक्षधर सांसदले गरेको हस्ताक्षरको ७ नम्बरमा नवलपरासी पूर्वका सांसद तिलकबहादुर महतले हस्ताक्षर गरेको बताए । उनका अनुसार ९२ सांसदको हस्ताक्षर संकलन भइसकेको छ ।

ओली पक्षधर ती सांसदका अनुसार यो हस्ताक्षर प्रतिनिधिसभा र राष्ट्रियसभाका सांसदहरूको हो । उनले ओलीलाई ५ वर्ष सरकारको नेतृत्व दिन प्रधानमन्त्री बनाएकाले यो पुष्टि गर्न हस्ताक्षर अभियान चलाइएको बताए ।

सांसदहरूका अनुसार ओलीका पक्षमा बहुमत जुटिसकेको छ । अर्का अध्यक्ष पुष्पकमल दाहाल (प्रचण्ड)ले ओलीविरुद्ध हस्ताक्षर अभियान चलाइरहेका बेला ओली पक्षले बालुवाटारमा हस्ताक्षर अभियान चलाएका हुन् । नेकपाको सचिवालय बैठक आझ साँझ बस्दै छ । सचिवालयमा शक्ति प्रदर्शन गर्ने उद्देश्यले हस्ताक्षर गरेको नेताहरूको दाबी छ ।