विराटनगर, बैशाख १६–हुँदा खाने भन्दा पनि हुनेखानेलेनै राहतमा आँखा गाडेपछी मोरङको कटहरी गाउँपालिकाले राहत वितरणमा फरक शैली अपनाएको छ । ज्यालादारी मजदुरी गरेर जिविकोपार्जन गर्ने अति विपन्न परिवालाई राहत लक्षित भएपनी हुनेखानैकै हामीमुहाली हुन थालेपछी गाउँपालिकाले सर्वदलिय छलफलबाट राहत वितरणमा फरक शैली अपनाउने निर्णय लिएको हो ।

गाउँपालिका अध्यक्ष रामकुमार कामतले हुनेखाने परिवारले समेत राहत लिएको पाइएकाले अब त्यसलाई नियन्त्रण गर्न लागिएको जानकारी दिए । उनले राहत सामाग्री जनसंख्याका आधारमा प्रत्येक वडालाई दिइने र वडाका विभिन्न स्थानमा वितरण केन्द्र राखि वडाबासीलाई दैनिक रुपमा कुपनका आधारमा राहत उपलब्ध गराउने बताए ।

‘प्रत्येक वडाका ४ देखि ५ ठाउँमा राहत वितरण केन्द्र राखेर जनप्रतिनिधि मार्फत दैनिक राहत वितरण गर्ने योजना बनाएका छौँ । २ जना सम्मको परिवारलाई दैनिक १ र त्यो भन्दा बढीको परिवारलाई २ केजी चालम वितरण गरिने छ ।’ उनले भने,‘ अब १÷२ केजी चामल लिन लाजले पनि दिनहुँ हुनेखाने मान्छे राहत लिन आउँदैनन् भन्ने निष्कर्श निकालेका हौँ ।’

उनले सर्वदलिय संयन्त्रमा छलफल गरेर सुझाबका अधारमा गाउँपालिकाले राहत वितरणका लागि १२ सय क्वीन्टल चामल खरिद गर्ने निर्णय गरेको र तत्काल वितरण केन्द्र राखेर राहत वितरण गर्न थालिने बताए ।

सर्वदलिय बैठकमा सहभागी नेपाल कम्युनिष्ट पार्टी(नेकपा) का १ नं. प्रदेश कमिटीका सदस्य मत्युञ्जय कुमार झाले जनप्रतिनिधिहरुले वितरण गरेको कुपनका आधारमा दैनिक रुपमा समय तोकेर सामाजिक दुरिसमेत कायम गरि वितरण गर्ने निर्णय भएको जानकारी दिए ।

‘यो राहत बिपन्न, ज्यालादारी मजदुर, असाहाय चुल्हो नबलिरहेका परिवार लक्षित हो । यो निर्णयले लक्षित राहत सम्पन्नले खाइ दिने जोखिमलाइ कम गर्छ भन्ने हाम्रो साझा ठहर हो ।’ उनले भने । गाउँपालिकाले पहिलो चरणको राहत वितरण गरिसकेर देस्रो चरणको राहत वितरण थालेको हो ।