जनकपुरधाम, १२ वैशाख-धनुषाको क्वारेन्टाइनमा बसेकी महिलामाथि बलात्कारको प्रयास भएको छ । धनुषाको विदेह नगरपालिका–६ स्थित क्वारेन्टाइनमा रहेकी २२ वर्षीया महिलामाथि गएराति बलात्कारको प्रयास भएको हो । ती महिला विगत ७ दिनदेखि त्यहाँ रहँदै आएकी थिइन्।

गएराति करिब ११ बजेको समयमा क्वारेन्टाइनमा सोही नगरपालिका-५ की ती महिलाउपर सरसफाइ कर्मचारी २८ वर्षीय संजीव पासवानले बलात्कारको प्रयास गरेको आरोप लागेको हो । बलात्कारको प्रयास गर्दा महिला चिच्याएर हल्ला गरेपछि त्यहाँ खैलाबैला मच्चिएको थियो ।

नगरपालिकाका मेयर बेचन दासले महिलाले लगाएको आरोप निराधार रहेको बताएका छन् । उनले ती महिलासँगै अर्को महिला पनि उनकै कोठामा रहेको र उनीसँग घटनाको सम्बन्धमा बुझ्दा महिलाले लगाएको आरोप गलत रहेको उनले दाबी गरे ।

‘आरोपित युवक त्यही गाउँको रहेको तथा उसले घटना घटाएको भए राति नै त्यहाँबाट फरार पनि हुनसक्थ्यो’ मेयर दासले भने । तर यसले त्यस्तो केही नगरेको मेयर दासले दाबी गरे । भारतबाट करिव १ हप्ता पहिले गाउँ आएकी महिलालाई आफूहरूले नै क्वारेन्टाइनमा बस्न लगाएको उनले जानकारी दिए । उनले ती महिलाको मानसिक स्थितिसमेत ठीक नरहेको बताए ।