काठमाडौं, ३ वैशाख-काठमाडौंको पेप्सीकोला टाउनप्लालिङमा रहेको सनसिटी अपार्टमेन्टमा गरिएका र्‍यापिड टेस्टमा २९८ जनामा नेगेटिभ रिपोर्ट आएको स्वास्थ्य मन्त्रालयले जनाएको छ ।

स्वास्थ्य तथा जनसंख्या मन्त्रालयको नियमित पत्रकार सम्मलेनमा सनसिटीमा गरिएको र्‍यापिड टेस्टमा २९८ जनाको नेगेटिभ रिपोर्ट आएको प्रवक्ता विकास देवकोटाले बताएका हुन् । संक्रमित बस्दै आएको ‘ए’ ब्लकमा गरिएको टेस्टमा सबैको नमुना नेगेटिभ आएको हो ।

उनले संक्रमित आरडिटी टेस्टमा ३ जनामा पोजेटिभ देखिए पनि पिसिआर विधिमा २ जनामा मात्रै पोजेटिभ देखिएको उनले बताए । अर्का व्यक्तिको पुन: परीक्षणमा पनि पोजेटिभ नदेखिएको उनको भनाइ छ । त्यस्तै, उनीहरूको सम्पर्कमा आएका सहयोगीहरूको पनि आरडीटी नेगेटिभ आएपछि पिसिआर विधिबाट परीक्षण गर्न लागिएको उनले बताए ।

गत चैत ८ गते सनसिटी अपार्टमेन्ट वेलफेयर सोसाइटीको चुनावमा संक्रमित परिवारका एक सदस्यले सहभागिता जनाएकाले अपार्टमेन्टमा रहेका सबैको परीक्षण थालिएको थियो । सनसिटी अपार्टमेन्टमा रहेका ५ वटा ब्लकमा ५ सय परिवारका करिब १ हजार ५ सय जना बस्दै आएका छन् ।