विराटनगर, चैत १०–विराटनगर महानगरपालिकाले भोलिदेखि लकडाउनको घोषणा गरेपछि गुद्री बजारमा तरकारी किन्नेको भीड लागेको छ । कोरोना भाइरसको जोखिम न्यूनीकरणका लागि महानगरपालिकाले भोलिदेखि अनिश्चितकालका लागि लकडाउनको घोषणा गरेको छ ।

साँझपख मात्रै गुद्रीमा तरकारी किन्नेको भीड हुने भए पनि आज दिउँसै देखि उपभोक्ताको भीड लागेको थियो । कोरोनाको सन्त्रासको फाइदा छोपी तरकारीमा समेत कालोबजारी भएको उपभोक्ताको गुनासो छ ।

भारतसँग सीमा जोडिएको नाका बन्द र गाउँबाट समेत तरकारी आउन छाडेपछि मूल्य आकाशिएको व्यापारी आशा साहले बताइन् । बाहिरबाट तरकारी नआउँदा व्यापारसमेत ह्वात्तै घटेको अर्का व्यापारी इन्दु पासवानले बताइन् ।

गुद्रीमा बिक्री हुने ९० प्रतिशत तरकारी भारतबाट आयात हुने गरेको सब्जी मण्डी तथा गुद्री बजार व्यवस्थापन समितिका अध्यक्ष पशुपति भगतले बताए । उनले तरकारीसहित अत्यावश्यक वस्तुको आयातलाई सहज बनाउन आग्रहसमेत गरे ।