कोरोना संक्रमण सतर्कता अपनाउन विराटनगर महानगरपालिकामा मंगलबार बिहान १० बजेदेखि लागू हुनेगरी ’लकडाउन’ गरिने भएको छ । प्रदेश १ को राजधानीसमेत रहेको विराटनगरमा अनिश्चितकालीन लकडाउनका समयमा कुनै पनि सार्वजनिक यातायात, निजी सवारी, सिटी, अटो, रिक्सा सबै ठप्प रहने सोमबार पत्रकार सम्मेलन गर्दै महानगरपालिकाले जनाएको हाे ।

अति आवश्यक कर्मचारीका लागि कार्यालय आउन जान निजी साधन वा कार्यालयले उपलब्ध गराएको साधन सञ्चालन हुने जनाइएको छ । लकडाउनका समयमा विराटनगरभित्रका सबै उद्योग, पसल, कार्यालय बन्द रहनेछ ।

तर, अति आवश्यक सामग्रीजस्तै दूधको पसल, औषधि, खाद्यान्न पसल खुल्ला रहनेछ । यसैबीच महानगरसँग जोडिएका सबै नाका बन्द रहनेछन् । तर, दैनिक उपभोग्य अति आवश्यकीय वस्तुको आवागमनमा भने रोक लगाइने छैन । कन्स्ट्रक्सनका सबै काम ठप्प हुनेछन् । साप्ताहिक हाटबजार तथा सबै धार्मिक स्थल बन्द गरिने पत्रकार सम्मेलनमा महानगरपालिकाका मेयर भीम पराजुलीले जानकारी दिए ।