चितवन, माघ १४–जिल्लाका विभिन्न स्थानमा गरिएको स्वास्थ्य परीक्षणमा १ सय ६ नयाँ एचआईभी संक्रमित भेटिएका छन् । भरतपुर अस्पतालमा रहेको एन्टी रेक्ट्रो भाइरल थेरापी (एआरटी) सेन्टरका अनुसार सन् २०१९ मा २० हजार ६ सय ४६ को परीक्षणका क्रममा ती नयाँ संक्रमण भेटिएको हो ।

संक्रमितमध्ये १ सय ४ जनाले नियमित औषधि सेवन गर्दै आएका छन् । संक्रमितको संख्या ९ सय ९१ पुगेको छ । सेन्टरका कार्यक्रम संयोजक कृष्णहरि सापकोटाका अनुसार एचआईभी संक्रमितलाई क्षयरोगबाट जोगाउन ७ सय २ लाई औषधि प्रदान गरिएको छ । गत वर्षमा ६ संक्रमितले सुरक्षित बच्चा जन्माएका छन् । गत वर्ष १३ संक्रमितले औषधि सेवन गर्न छाडेको एआरटी सेन्टरले जनाएको छ । रासस