जनकपुर, पुस २५–धनुषामा पत्रकारमाथि कुटपिट भएको चार दिन बितिसक्दा पनि कारबाहीको प्रक्रिया अघि बढेको छैन । नगरपालिकाका कर्मचारीले मेयरकै अगाडी आधा दर्जन पत्रकारहरूलाई हातपात गर्दै कार्यालयको कम्पाउण्डसम्म लगेका थिए । प्रहरीले पहिलो दिन नै नगरपालिकाबाट घटनाको भिडियो फुटेज लगेको भए पनि घटनामा संलग्न कर्मचारीविरुद्ध कारबाहीको प्रक्रिया अघि बढाएको छैन । कुटपिट गरेको भिडियो सामाजिक सञ्जालमा समेत सार्वजनिक भइसकेका छन् ।

यसैबीच, जनकपुरधाम उपमहानगरपालिकाका मेयर लालकिशोर साहलाई कारबाहीको माग गर्दै जनकपुरधामका विभिन्न संघसंस्थाले शुक्रबार जिल्ला प्रशासन कार्यालय धनुषामा ६ बुँदे मागसहित संयुक्त ज्ञापनपत्र बुझाएका छन् । जानकी मन्दिरको फुलबारी जग्गा अतिक्रमण सम्बन्धमा समाचार संकलनका लागि मेयर साहको प्रतिक्रिया लिन पुगेका सञ्चारकर्मीलाई गत मंगलबार नियोजित रूपमा कुटपिट गर्ने मेयर साहलाई कारबाहीको माग गर्दै विभिन्न संघसंस्थामा आवद्ध युवाहरूले प्रमुख जिल्ला अधिकारी प्रदीपराज कँडेललाई संयुक्त रूपमा ज्ञापनपत्र बुझाएका हुन् ।

मधेश अधिकार संघर्ष समिति, भ्रष्टाचारविरुद्धको युवा अभियान, परिवर्तनका लागि युवा अभियान, अंगराजसर संरक्षण समिति, जानकी चोक युवा समूह र जनकपुर नागरिक समाजलगायतका संघसंस्थाले ज्ञापनपत्र बुझाएका हुन् । उनीहरूले जनकपुरधाम उपमहानगरपालिकाको कार्यालयमा सूचना अधिकारीको नियुक्त हुनुपर्ने, हालसम्म नियुक्त भएका कर्मचारीको भर्ना प्रक्रिया र संख्या सार्वजनिक गर्नुपर्ने, २५ वटै वडामा गरिएको विकास निर्माणको योजना र उपभोक्ता समिति नामावली पारदर्शी हुनुपर्ने, सञ्चारकर्मीले सहज रूपमा सूचना पाउनुपर्ने, जानकी मन्दिर फूलबारी जग्गा अतिक्रमणको छानबिन गरी सत्यतथ्य सार्वजनिक गर्नुपर्नेलगायतका माग राखेका छन् ।