विराटनगर । नेपालमा दिनप्रतिदिन बढ्दो तस्करी, चोरी पैठारी र अवैध कारोबारको विषयलाई लिएर मोरङ उद्योग व्यापार संघले संघीय सरकारका गृह मन्त्री रमेश लेखकलाई विशेष छलफलमा सहभागी गराउँदै गम्भीर ध्यानाकर्षण गराएको छ।

मोरङ उद्योग व्यापार संघको कार्यालयमा आयोजित छलफल कार्यक्रममा संघका अध्यक्ष अनुपम राठी, नेपाल उद्योग परिसंघ कोशी प्रदेशका अध्यक्ष तथा संघका पूर्व अध्यक्ष पवनकुमार सारडालगायत उद्योगी व्यवसायीहरूको उपस्थिति रहेको थियो।

कार्यक्रममा अध्यक्ष राठीले हाल नेपालमा बढ्दो गैरकानुनी गतिविधिहरू—जसमा तस्करी, चोरी पैठारी र अवैध कारोबार मुख्य समस्या बनेका छन्—प्रति गम्भीर चिन्ता व्यक्त गरे। उनले यस्तो गतिविधिबाट नेपालको आर्थिक, सामाजिक तथा सुरक्षात्मक संरचनामा प्रत्यक्ष असर परिरहेको बताए।
ूयसरी हुने अवैध कारोबारले सरकारको राजस्व संकलनमा ठूलो घाटा पुग्नुका साथै स्वदेशी उद्योगको प्रतिस्पर्धात्मक क्षमता गुम्दै गएको छ,’ अध्यक्ष राठीले भने, ‘यसले उत्पादनशीलता, रोजगारी र दीर्घकालीन आर्थिक स्थायित्वमा गम्भीर खतरा उत्पन्न गरेको छ।’
खुला सीमाको कारण सीमावर्ती क्षेत्रहरूमा हुने तस्करी र चोरी पैठारी नियन्त्रण गर्न नसकिएको अध्यक्ष राठीको भनाइ थियो। उनले प्रविधिमैत्री निगरानी प्रणालीको प्रयोग, सुरक्षाकर्मीको सक्रियता वृद्धि तथा स्पष्ट र प्रभावकारी नीतिगत सुधारको आवश्यकता औँल्याए।
त्यसका साथै, उनले सीमावर्ती बजारमा भारतीय वस्तुहरू नेपाली बजारको तुलनामा सस्तो हुने कारण नेपाली उपभोक्ता दैनिक रूपमा सीमापारि किनमेल गर्न बाध्य भएका र यसबाट करोडौं रुपैयाँको अवैध कारोबार तथा विदेशी मुद्रा बाहिरिने खतरा बढेको उल्लेख गरे।

अध्यक्ष राठीले अवैध कारोबारको कारण राज्य संयन्त्रमा भ्रष्टाचार मौलाउने, कानुनी शासन कमजोर बन्ने, लागू पदार्थ, हतियार र मानव तस्करीसमेत बढ्ने खतरा रहेको बताएका थिए। उनले भने, ‘यस्ता कार्यले समाजमा आपराधिक प्रवृत्तिको वृद्धि, युवा पुस्तामा नैतिक पतन र सामाजिक अस्थिरता निम्त्याउँछ।’
उनले सरकारलाई विशेषगरी जीएसटी कम भएका दैनिक उपभोग्य वस्तुहरूको आयात शुल्क पुनरावलोकन गर्न र बजार सन्तुलन कायम गर्न सुझाएका थिए।

कार्यक्रममा बोल्दै गृह मन्त्री रमेश लेखकले संघको चिन्तालाई गम्भीरतापूर्वक लिएको बताउँदै तस्करी र अवैध कारोबार नियन्त्रण सरकारको उच्च प्राथमिकता रहेको स्पष्ट पारे। ‘म यो विषय प्रधानमन्त्री, अर्थमन्त्री लगायत सम्बन्धित निकायसँग छलफल गर्छु,’मन्त्री लेखकले भने, ‘मन्त्रिपरिषद्मा समेत कुरा उठाउनेछु र नीति, स्रोत तथा सहकार्यमा कुनै कमी गरिने छैन।’ गृह मन्त्रीले आगामी एक महिनाभित्र तस्करी नियन्त्रणको प्रत्यक्ष प्रभाव देखिने गरी पहल गरिने विश्वाससमेत दिलाए।