विराटनगर । विराटनगरको हाटखोला खेल मैदानमा शुक्रबार साँझ आयोजना हुने गायक दुर्गेस थापाको लाइभ प्रस्तुतिको सम्पूर्ण तयारी पूरा भएको आयोजकले जनाएको छ। पछिल्लो समय नेपाली म्युजिक स्टेजका चर्चित नाम बनेका थापा पहिलोपटक विराटनगरमा प्रस्तुति दिन लागेका हुन्।

कार्यक्रमका संयोजक तथा लाईभ इन्टरटेनमेन्टका निर्देशक सेन्ट्रो महतका अनुसार, कार्यक्रम स्थलमा स्टेज निर्माणदेखि सुरक्षासम्मका सम्पूर्ण व्यवस्थापन सम्पन्न भइसकेका छन्। महतले भने, “हामीले प्राविधिक पक्ष, सुरक्षाको व्यवस्था, साउन्ड सिस्टम र दर्शकको बस्ने ठाउँलगायत सबै कामहरू अन्तिम चरणमा पुर्‍याएका छौं। अब दर्शकलाई भरपूर मनोरञ्जन दिने काम दुर्गेस थापाले गर्नेछन्।”

लाइभ इन्टरटेनमेन्ट र भाइरल इभेन्ट इन्टरटेनमेन्टको संयुक्त आयोजना रहेको सो कार्यक्रममा साँझ ५ बजेपछि फेशन शो सहित दुर्गेस थापाको दमदार प्रस्तुति हुनेछ। कार्यक्रममा दुर्गेस थापासँगै स्थानीय कलाकारहरू पनि सहभागी हुनेछन्।

महतका अनुसार, “हामीले यहाँका युवालाई मञ्च दिने लक्ष्यका साथ स्थानीय प्रतिभाहरुको पनि प्रस्तुति राखेका छौं। दुर्गेस थापा भनेका आफैंमा एउटा इनेर्जी हुन्। उनको स्टाइल र दर्शकसँगको अन्तरक्रियाले कार्यक्रमलाई झनै रोमाञ्चक बनाउनेछ।”

दुर्गेस थापाको प्रस्तुति यति कारणले पनि प्रतीक्षित मानिएको छ किनभने उनी स्टेजको परिधिभन्दा बाहिर गएर पनि दर्शकमाझ रमाउने गर्छन्। कतिपय कार्यक्रममा उनले आफ्ना पहिरन फेरेर वा दर्शकलाई मञ्चमा बोलाएर समेत प्रस्तुति दिएका उदाहरण छन्। निर्देशक महत भन्छन्, “उनी जहिले पनि फरक केही गर्छन्। आयोजकलाई कहिलेकाहीँ अप्ठ्यारो पनि पर्न सक्छ, तर दर्शकको लागि त्यो विशेष अनुभव हुन्छ।”

कार्यक्रममा सहभागी हुन टिकट खरिदको लागि अहिले विराटनगरका विभिन्न पसल तथा क्याफेहरूमा टिकट उपलब्ध छन् भने ‘खल्ती एप’मार्फत पनि सजिलै टिकट बुकिङ गर्न सकिन्छ। महतले टिकट बिक्रीको प्रतिक्रियाबारे थप्दै भने, “दर्शकको उत्साह निकै उत्साहजनक छ। टिकट विक्री तीव्र गतिमा भइरहेको छ, हामीलाई विश्वास छ कि दर्शकले कार्यक्रमलाई ऐतिहासिक बनाउनेछन्।”

विगतमा विराटनगरमा थुप्रै सफल साँगीतिक कार्यक्रम गरिसकेको यस टिमको यो अर्को ठुलो प्रयास हो। दुर्गेस थापाको आगमनसँगै विराटनगरको यो साँझ सांगीतिक धमाकाको रात बन्ने आयोजकको विश्वास छ।

महतले अन्त्यमा भने, “संगीत माया गर्ने सम्पूर्णलाई कार्यक्रममा उपस्थित भइ दुर्गेस थापाको जादु हेर्न र रमाउन आग्रह गर्छौं।”