विराटनगर । विराटनगरका समाजसेवी राजन श्रेष्ठ नेपाल क्षयरोग निवारण संस्थाको उपाध्यक्षमा निर्वाचित भएका छन् । संस्थाको काठमाण्डौमा सम्पन्न १२ औं महाधिवेशनमा श्रेष्ठ उपाध्यक्ष पदमा ८६ मत ल्याएर निर्वाचित भएका हुन् ।
क्षयरोग निवारणको क्षेत्रमा लामो समयदेखि क्रियाशील श्रेष्ठले यसअघि नेपाल क्षयरोग निवारण संस्थाको महासचिव रहेका थिए । उनले क्षयरोग निवारण संस्था मोरङको अध्यक्षको रूपमा पनि सफल कार्यकाल पूरा गरिसकेका छन् । उनी क्षयरोग नियन्त्रण र रोकथामका विभिन्न कार्यक्रमहरू सञ्चालन गर्न सक्रिय रूपमा संलग्न रहँदै आएका थिए।
श्रेष्ठ विराटनगरका विभिन्न सामाजिक संघसंस्थाहरूमा पनि सक्रिय सदस्यको रूपमा आवद्ध रहेका छन् । उनी विराटनगरको प्रतिष्ठित सामाजिक संस्था झि : पुचका सल्लाहकार समेत हुन् । स्थानीय स्वास्थ्य क्षेत्रमा उनको योगदानलाई स्थानीयहरूले उच्च मूल्याङ्कन गर्दै आएका छन्।
उपाध्यक्षमा निर्वाचित भएपछि श्रेष्ठले नेपालमा क्षयरोग नियन्त्रण र निवारणका लागि थप प्रभावकारी कार्यक्रमहरू सञ्चालन गर्ने प्रतिबद्धता व्यक्त गरेका छन् । उनले विशेषगरी ग्रामीण क्षेत्रमा क्षयरोगको पहिचान, उपचार र जनचेतना अभिवृद्धिमा जोड दिने बताएका छन्।
‘देशभर क्षयरोग निवारणको अभियानलाई थप सशक्त बनाउन हामी प्रतिबद्ध छौं,’ श्रेष्ठले भने, ‘विशेषगरी सेवामा पहुँच कम भएका समुदायसम्म हाम्रा कार्यक्रमहरू पुर्‍याउन प्राथमिकता दिनेछौं।’
नेपाल क्षयरोग निवारण संस्थाको अध्यक्षमा भने देवेन्द्र प्रधान निर्वाचित भएका छन् ।