विराटनगर । नेपाल औषधी व्यवसायी संघ (एनसीडिए ) मोरङ शाखाले धनपालथान गाउँपालिका ६ मा अग्निपीडित परिवारहरूलाई राहत सामग्री वितरण गरेको छ । स्थानीय जनप्रतिनिधिहरूको रोहबरमा पीडित परिवारहरूलाई खाद्यान्न तथा लत्ता कपडा वितरण गरिएको हो ।
गत मंगलबार दिउँसो धनपालथान गाउँपालिकाको कदमामा रहेको मुस्लिम बस्तीमा भएको आगलागीमा तीन वर्षीया बालिका रेश्मा खातुनको मृत्यु भएको थियो । उक्त दुर्घटनामा १२ घर परिवारका १६ वटा छाप्रा जलेर नष्ट भएका थिए, जसबाट ४० भन्दा बढी स्थानीय विस्थापित भएका छन् ।
नेपाल औषधी व्यवसायी संघ मोरङ शाखाका अध्यक्ष देशबन्धु ढकालको नेतृत्वमा पुगेको टोलीले आफ्नो संस्थाको सामाजिक उत्तरदायित्व अन्तर्गत पीडित परिवारहरूलाई राहत सामग्री वितरण गरेको हो । पीडित परिवारहरूलाई चामल, दाल, तेल, नुन, चिनी लगायतका खाद्यान्न सामग्री तथा जुल वितरण गरिएको छ । संघका अध्यक्ष देशबन्धु ढकालले यस्ता विपद्का समयमा संघले मानवीय सहायता प्रदान गर्ने कार्यलाई निरन्तरता दिने बताए । ‘हामीले आफ्नो सामाजिक उत्तरदायित्व अन्तर्गत सहयोग गरेका हौं, आगामी दिनमा पनि यस्ता सहयोगहरू जारी राख्नेछौं,’ उनले भने ।
राहत वितरण कार्यक्रममा धनपालथान गाउँपालिका अध्यक्ष जिवछप्रसादले अग्निपीडित परिवारहरूको पुनस्र्थापनाको लागि पालिकाले पनि आवश्यक सहयोग गर्ने प्रतिबद्धता व्यक्त गरे । उनले नेपाल औषधी व्यवसायी संघ मोरङ शाखाको यस सहयोगले पीडित परिवारहरूलाई केही राहत मिल्ने विश्वास व्यक्त गरे ।
अग्निपीडित परिवारका प्रतिनिधि इर्साद मियाँले आगलागीबाट आफूहरूको सम्पूर्ण सम्पत्ति नष्ट भएको र अहिले आश्रयको लागि मस्जितमा बस्न बाध्य भएको बताए ।
राहत वितरण कार्यक्रममा औषधी व्यवसायीहरु, वडा अध्यक्ष सहित स्थानीय जनप्रतिनिधि, स्थानीय नागरिक समाज, संघ संस्थाका प्रतिनिधिहरू र पीडित परिवारका सदस्यहरूको उपस्थिति रहेको थियो ।