विराटनगर । राष्ट्रिय सौन्दर्यकर्मी यूनियन नेपाल (नाबुन) विराटनगर महानगर कमिटिले आफ्नो वार्षिकोत्सवको अवसरमा सामुदायिक विद्यालयकी एक जेहेन्दार छात्रालाई छात्रवृत्ति प्रदान गरेको छ ।
विराटनगर २ स्थित जनता नमुना माध्यमिक विद्यालयमा अध्ययनरत कक्षा आठकी छात्रा भारती कुमारी कामतलाई यो छात्रवृत्ति प्रदान गरिएको हो । नाबुन विराटनगर महानगर कमिटिले भारतीको कक्षा दश सम्मको शिक्षामा लाग्ने सम्पूर्ण खर्च व्यहोर्ने घोषणा गरेको छ ।
सोमबार विद्यालय परिसरमा आयोजित एक विशेष कार्यक्रममा नाबुन विराटनगर महानगर कमिटिकी अध्यक्ष भली सुब्बाले सामुदायिक विद्यालयमा अध्ययनरत जेहेन्दार विद्यार्थीहरूलाई पठनपाठनमा सहयोग पु¥याउने उद्देश्यले यो पहल गरिएको बताइन् । ‘यसअघि हामी वार्षिकोत्सवमा विभिन्न सामाजिक कार्यहरू गर्दै आएका थियौं । यसपटक हामीले शिक्षा क्षेत्रमा योगदान गर्ने निर्णय ग¥यौं,’ उनले भनिन् ।

नाबुनकी केन्द्रीय सदस्य गंगा तामाङले यस छात्रवृत्तिले आर्थिक रूपमा कमजोर तर प्रतिभाशाली विद्यार्थीको भविष्य निर्माणमा महत्त्वपूर्ण भूमिका खेल्ने कुरामा जोड दिइन् । नाबुन प्रदेश अध्यक्ष कला डाँगीले पनि यस कार्यक्रमको प्रशंसा गर्दै विद्यार्थीहरूलाई शिक्षामा सहयोग पु¥याउने यस्ता पहलहरूको महत्व बताइन् ।
विद्यालयका सहायक प्रधानाध्यापक चिन्तामणी रिजालले भारतीजस्ता जेहेन्दार विद्यार्थीहरूलाई दिइने यस्ता छात्रवृत्तिले उनीहरूको शैक्षिक यात्रामा ठूलो टेवा दिने बताए । विद्यालयका अध्यक्ष मनोज विक्रम साहले सौन्दर्यकर्मीहरूको यस पहलको प्रशंसा गर्दै यसले समाजमा सकारात्मक सन्देश प्रवाह गर्ने विश्वास व्यक्त गरे ।
छात्रवृत्ति प्राप्त गर्ने भारती कामतले आफूलाई यो अवसर प्रदान गरेकोमा नाबुनप्रति आभार व्यक्त गर्दै, यसले आफ्नो शैक्षिक यात्रामा थप प्रेरणा दिएको बताइन् । उनले कक्षा दशसम्मको शिक्षा पूरा गरेपछि उच्च शिक्षा हासिल गर्दै आफ्नो समुदायको लागि योगदान दिने लक्ष्य राखेको बताइन् ।
कार्यक्रममा नाबुन विराटनगर महानगरकी सचिव बसन्ती गुरुङले कार्यक्रम संचालन गरेकी थिइन् भने नाबुन प्रदेशकी कोषाध्यक्ष अमिता पोखरेल, जिफन्ट कोशी प्रदेशकी महिला सचिव सायदा तवसुम लगायत अन्य सौन्दर्यकर्मीहरूको उपस्थिति रहेको थियो ।
विद्यालयका शिक्षक र विद्यार्थीहरूले पनि कार्यक्रममा सहभागिता जनाएका थिए । शिक्षकहरूले यस्ता पहलहरूले विद्यार्थीहरूलाई निरन्तर अध्ययनमा प्रोत्साहित गर्ने र समाजमा शिक्षाको महत्त्व बढाउने विचार व्यक्त गरे ।
नाबुन विराटनगर महानगर कमिटिले आगामी दिनहरूमा पनि यस्ता शैक्षिक सहयोग कार्यक्रमहरू निरन्तर रूपमा संचालन गर्ने योजना बनाएको जनाएको छ । यसले समाजमा शिक्षाको महत्त्व बढाउनुका साथै आर्थिक रूपमा कमजोर परिवारका प्रतिभाशाली विद्यार्थीहरूलाई उच्च शिक्षा हासिल गर्न प्रोत्साहित गर्ने अपेक्षा गरिएको छ ।
छात्रवृत्ति प्राप्त गर्ने भारती कामतका अभिभावकले पनि यो सहयोगले आफ्नो छोरीको शैक्षिक भविष्य उज्ज्वल बनाउन मद्दत गर्ने आशा व्यक्त गरे । उनीहरूले आफ्नो परिवारको आर्थिक अवस्था कमजोर भएकाले यस्तो सहयोगले ठूलो राहत मिलेको बताए ।