विराटनगर । श्रृंखलाबद्ध रुपमा ठगी गरेको आरोपमा प्रहरीले ६ जनालाई पक्राउ गरेको छ । नक्कली सुन देखाई नगद तथा गरगहना ठगी गरेको आरोपमा भारतीय नागरिकसहित ६ जनालाई प्रहरीले पक्राउ गरेको हो ।
पक्राउ पर्नेमा संखुवासभा पाचखपन गाउँपालिका–५ खपनटोल निवासी ५६ वर्षीय कृष्णबहादुर तामाङ, झापा तोपगाछी गाउँपालिका १ का ५२ वर्षीय अशोक तामाङ, कन्काई नगरपालिका–९ घैलाडुब्बाका ५९ वर्षीय ढकलबहादुर थिङ्ग, अर्जुनधारा नगरपालिका–११ का ५४ वर्षीय प्रविन तामाङ, हल्दीबारी गाउँपालिका–३ बाघडाँडा बस्ने ६६ वर्षीय रामबहादुर कन्दङ्वा, भारतको बंगालस्थित नक्सालवाडीका ५१ वर्षीय नारायण गुरुङ, नक्सलबाडीका ३४ वर्षीय सन्जय शर्मा रहेका छन् । पक्राउ परेका आरोपितहरुलाई मोरङ प्रहरीले सोमबार पत्रकार सम्मेलन गरी सार्वजानिक गरेको छ ।
उनीहरुको समूहले पूर्वका विभिन्न जिल्लामा नक्कली सुनका टिल (बिस्कुट) बोकेर सर्वसाधारणसँग चिनजान गर्ने र त्यसपछि आफन्त भएर नजिकीदै ठगी गर्ने गरेको प्रराम्भिक चरणको अनुसन्धानबाट खुलेको मोरङ प्रहरी प्रमुख एसपी नारयण चिमरियाले बताए । ‘आफन्त भएपछि उनीहरुको असजिलो बुझेर नक्कली सुन देखाउने, पैसा भएको थाहा पाए झुक्याएर चोरी गरेर फरार हुने गरेको खुलेको छ,’ उनले भने, ‘होटलमा बस्दा समेत उनीहरुले आफ्नो पहिचान बदल्ने र बारम्बार होटल परिवर्तन गर्ने गरेको पाइएको छ ।’

उनीहरुले विभिन्न जिल्लाका अस्पताल, मेला, हटिया तथा भीडमा सुटबुटमा सजिएर अपरिचितलाई समेत आफन्त बनाएर ठगीधन्दा चलाउने गरेको प्रहरीले जनाएको छ ।

अस्पतालबाट १ लाख लुटेपछि यसरी पक्राउ परे गिरोह
विराट टिचिङ अस्पताल बुढीगंगामा श्रीमतीलाई उपचार गराउन आएका संखुवासभाको पाचखापन गाउँपालिका ५ का ५६ वर्षीय कृष्ण बहादुर तामाङको २७ कार्तिकमा १ लाख १० हजार रुपैयाँ चोरी गरी पक्राउ परेका गिरोहका समूह फरार भए । पक्राउ परेका मध्ये पीडित तामाङ्गसँग अकोश तामाङ्गले आफन्भ भन्दै चिनजान गरेका थिए । पछि उनले रकम चोरेर फरार भए । आफन्त भएको नाता लगाएर उनीहरुले रकम लुटेपछि कोशी प्रदेश प्रहरी कार्यालयको प्रादेशिक अनुसन्धान समूह, जिल्ला प्रहरी कार्यालय सुनसरीसँग समन्वय गरेर मोरङ प्रहरीले ठगीमा संलग्न तामाङलाई पक्राउ गर्यो । त्यसपछि सर्वसाधरणलाई ठगी गर्दै फरार हुने गिरोहको संजाललाई प्रहरीले पक्राउ गर्न सफल भएको हो ।
राम्रा पोशाकमा सजिएका उनीहरुले पछिल्लो समय विराट टिचिङमा घटाएको घटना सिसी टिभी फुटेजका आधारमा प्राविधिक विश्लेषण गरेर पत्ता लगाइएको थियो । उनीहरुको गिरोहलाई प्रहरीले अशोक तामाङ लुटपाट गिरोहको रुपमा खोजतलास गरेको थियो । सुनसरीको इटहरीमा रहेको खुलेपछि उनीहरुलाई नियन्त्रणमा लिइएको हो ।

प्रहरी उपरीक्षक चिमरियाका अनुसार उनीहरुको अपराध कार्यविधी समेत फरक देखिएको छ । बुद्धबुद्धासँग नजिक हुने र उनीहरुले लगाएको गहना तथा पैसा चोर्ने मात्रै नभई नक्कली सुन जस्तो वस्तु देखाएर नगद समेत मागि फरार हुने गरेको देखिएको हो । पक्राउ परेकाहरु विरुद्ध मुलुकी अपराध संहिताको परिच्छेद २१ को दफा २४९ अन्तर्गत ठगी गर्न नहुने कसुरमा जिल्ला अदालत मोरङबाट म्याद थप भएर अनुसन्धान सुरु गरिएको छ ।