विराटनगर । जिल्ला कारागार मोरङमा कैद सजाय भुक्तान गरिरहेका एक जना कैदीको आइतबार बिहान मृत्यु भएको छ ।

विराटनगर महानगरपालिका–८ घर भएका ५५ वर्षीय महानन्द राय अमातको मृत्यु भएको कारागारका जेलर चेतराज बरालले बताए । उनका अनुसार दुवै खुट्टामा घाउ आएर पाकेपछि अमातलाई उपचारका लागि कात्तिक २१ गते साँझ विराटनगरको कोशी अस्पतालमा भर्ना गरिएको थियो ।
उनलाई मधुमेह, उच्च रक्तचाप र मिर्गौला सम्बन्धी पुरानै समस्या रहेको जानकारी बरालले दिए । अस्पतालको आईसीयूमा उपचाररत अमातको बिहानका राति ३ बजेतिर मृत्यु भएको उनको भनाइ छ ।

भाडा लिएर बसेको घर खाली गर्न नमानेको र भाडा नतिरेको भन्दै अमातविरुद्ध घरधनीले मुद्दा हालेका थिए । ‘घर भाडा दिलाइ घर खाली गराइ पाउँ’भन्ने शीर्षकको मुद्दामा जिल्ला अदालत मोरङले उनलाई गत असोज १३ गते दोषी ठहर गर्दै २ वर्ष कैद सजाय हुने फैसला गरेको थियो ।

भाडाबापत उनले घरधनीलाई ९ लाख रूपैयाँ तिर्न बाँकी रहेको अदालतले यकिन गरेको छ । अदालतको फैसलापछि कैद सजाय भुक्तान गरिरहेका अमातको कोशी अस्पतालमा उपचाररत अवस्थामै मृत्यु भएको जेलर बरालले बताए । उनका अनुसार शवलाई परिवारका सदस्यले दाहसंस्कारका लागि लिएर गइसकेका छन् ।

मोरङ कारागारमा अहिले ९९ महिला र ५ जना नाबालकसहित १ हजार ९६ जना कैदीबन्दी रहेको जानकारी बरालले दिए । कारागारभित्र क्षमताभन्दा अत्यधिक धेरै राखिँदा कैदीबन्दीको दैनिकी निक्कै कष्टकर बनिरहेको छ ।