विराटनगर । जातिय पहिचान र संस्कृतिको संरक्षण गर्न संगठित हुनुपर्ने एक कार्यक्रममा सहभागिहरुले जोड दिएका छन् ।

तेली कल्याण समाज नेपाल विराटनगर १२ ले आउँदै गरेको दशै, तिहार, छठ पर्वलाई लक्षित गरेर शनिबार शुभकामना तथा सम्मान कार्यक्रममा सहभागिहरुले यस्तो बताएका हुन् ।

सहभागिहरुले दाईजो प्रथा अन्त्यका लागि शिक्षामा विशेष जोड दिनुपर्ने बताए । त्यसको लागि तेली कल्याण समाजले नेतृत्व गरेर अगाडि बढ्नुपर्नेमा जोड दिए । कार्यक्रमको प्रमुख अतिथि तेली कल्याण समाज नेपालका अध्यक्ष डा. बालकृष्ण साहले आफ्नो संस्कृति संरक्षणमा सबै जना एक जुट भएर अगाडी बढनुपर्ने बताए । तेली कल्याण समाजले विराटनगरमा आफ्नै जग्गा र भवनका तयारी गर्दै गरेको र यसका लागि सबैले पहल गर्न उनले अनुरोध गरे । अध्यक्ष साहले अबको अधिवेशन आफ्नै भवनमा गर्ने गरि तयारीमा जुट्न आग्रह गरे ।

समाजका १२ का अध्यक्ष सत्यनारायण साहको अध्यक्षतामा भएको सो कार्यक्रममा समाजका महानगर अध्यक्ष सञ्जय साह,अधिवक्ता सञ्जु साह, सामुदायिक भवनका अध्यक्ष तथा सचिव लगायत गरी करिब ७५ जना तेली समुदायका स्थानीयहरुको उपस्थिति रहेको थियो ।
कार्यक्रममा विराटनगर १२ का सेवा–निवृत नापी सर्वेक्षक ६४ बर्षिय फुलेश्वर साहलाई समाजप्रति उनले गरेको योगदानलाई कदर गर्दै सम्मान गरियो ।