विराटनगर । विराटनगरबाट प्रहरीले ठूलो परिमाणमा गाँजा बोकेका दुईवटा कारसहित चारजनालाई छुट्टाछुट्टै स्थानबाट पक्राउ गरेको छ । सोमबार राती छुटा छुट्टै दुई स्थानबाट १८९ केजी गाँजा सहित चार जनालाई पक्राउ गरेको हो ।

लागु औषध गाँजा ओसार पसार भई रहेको भन्ने गोप्य सुचनाको आधारमा प्रहरी निरीक्षक प्रकास थापाको कमाण्डामा इप्रका रानी र लागूऔषध ब्युरो बिराटनगर बाट खटिएको संयुक्त प्रहरी टोलिले जेकजाँचको क्रममा उनीहरुलाई पक्राउ गरेको हो ।
विराटनगर १५ र १७ मा चेकजाँच गर्ने क्रममा दुईवटा कारमा गाँजा बरामद गरेको जिल्ला प्रहरी कार्यालय मोरङका प्रवक्ता डिएसपी ज्ञानेन्द्र बहादुर बस्नेतले जानकारी दिए ।
विशेष सुचनाका आधारमा सोमबार बिहान विराटनगर–१७ मा बा.८च ७८८० नम्बरको कारलाई चेकजाँच गर्दा पछाडी पट्टी ४३ किलोग्राम गाँजा बरामद भएको थियो । कारमा रहेका विराटनगर–१५ का ३२ वर्षीय गणेश चौधरी र विराटनगर–१३ का २२ वर्षीय रोजेश परियारलाई नियन्त्रणमा लिइएको थियो ।
यसैगरी सोमबार राती ८ बजे विराटनगर–१७ मण्ठा पोखरीस्थितमा को.२ च ७५९ नम्बरको स्कार्पीयो गाडीलाई चेकजाँच गर्दा १४६ केजी गाँजा बरामद भएको थियो । गाँजा बरामद भएपछि चालक सुनसरी धरान–१७ का ४५ वर्षीय सुक्षिम राई र धरान–११ का ४६ वर्षीय देवराज राईलाई नियन्त्रणमा लिइएको थियो ।
नियन्त्रणमा परेका उनीहरुको सम्बन्धमा इलाका प्रहरी कार्यालय रानीले अनुसन्धान अगाडी बढाएको जानकारी दिइएको छ । यस अगाडी समेत विराटनगरबाट बारम्बार गाँजा बरामद हुँदै आएको छ । गाँजा ओसारपसारको ट्रान्जिट जस्तै हुँदै आएको छ ।