विराटनगर । विराटनगरमा पाँचौ विराट सडक महोत्सव हुने भएको छ । विजय दशमीको अवसर पारेर आउँदो असोज १७ गतेदेखि विराट सडक महोत्सव हुने भएको हो ।

मन्जिना मुभिज क्रीयसन प्रालिको आयोजनामा हुने उक्त महोत्सवमा तयारी भइरहेको विराटनगरमा बुधबार पत्रकार सम्मेलन गरी जानकारी गराएको हो । असोज २३ गतेसम्म संचालन हुने महोत्सवमा ३० वटा स्टल रहने मन्जिना मुभिज क्रीयसन प्रालिका अध्यक्ष जतिन तम्रकारले जानकारी दिए । महोत्सवमा विभिन्न सामुदायिका खानाका स्टलहरु रहनेछ । दिउँसो साढे २ बजेपछि सुरु हुने महोत्सव विराटनगरको ट्राफिक चोकदेखि महेन्द्र चोकसम्मको सडकमा लाग्नेछ । हरेक दिन स्थानीय कलाकारहरुको सांगीतिक प्रस्तुत हुनेछ । जसले गर्दा महोत्सवमा आउने दर्शकहरुलाई थप रमाइलो हुने आयोजकले अपेक्षा राखेको छ ।
उक्त महोत्सव सम्पन्न गर्न १५ लाख भन्दा बढी खर्च हुने आयोजकले अनुमान गरेको छ । ३० स्टलम मध्ये अहिलेसम्म १७ वटा स्टल बुक भइसकेको अध्यक्ष तम्राकारले बताए । ‘महोत्सवमा तयारी भइरहेको छ । प्रत्येक स्टलको २० हजार रुपैयाँ शुल्क तोकिएको छ । अहिले १७ स्टल बुक भइसक्यो अब १३ वटा स्टल मात्रै बाकी रहेको छ ,’ उनले भने, ‘हामीले स्थानीय सामुदायका संस्कृतिको प्रर्वद्धन गर्ने उद्देश्यले यो विराट सडक महोत्सव प्रत्येक वर्षको दशैंमा गर्दै आएको हो ।’